चुनावी हार भुल्दै ‘कस्तुरी’ सुटिङ सेटमा निखिल उप्रेतीसँग फर्किईन् निशा अधिकारी

इटहरी/ काठमाडौँ क्षेत्र नम्बर ५ बाट प्रतिनिधिसभा निर्वाचनमा पराजय भोगे पनि अभिनेत्री निशा अधिकारी पुनः आफ्नो पुरानै लय अर्थात् अभिनयमै फर्किएकी छन् । चुनावी दौडधुप र व्यस्तता सकिएलगत्तै उनी आफ्नो डेब्यु फिल्मका नायक निखिल उप्रेतीसँग नयाँ फिल्म ‘कस्तुरी’को छायांकनमा जोडिएकी हुन् । विगत एक महिनादेखि काठमाडौँ र यस आसपासका क्षेत्रमा धमाधम सुटिङ भइरहेको यस फिल्मको निर्माण टिमलाई निशाले विशेष धन्यवाद दिएकी छन् ।

निर्वाचनको दौडानमा आफू व्यस्त रहँदा सुटिङ नै रोकेर पर्खिदिएको भन्दै उनले कृतज्ञता प्रकट गरेकी हुन् । लामो समयपछि अभिनेता निखिलसँग स्क्रिन सेयर गर्न पाउँदा आफू निकै उत्साहित रहेको निशाले बताएकी छन् । निशा अधिकारीको ‘कमब्याक’ रहेको यस फिल्ममा नेपाली फिल्म क्षेत्रका चर्चित एक्सन स्टार निखिल उप्रेती र लोकप्रिय अभिनेत्री वर्षा सिवाकोटी पहिलोपटक एकसाथ पर्दामा देखिँदैछन् । दर्शकहरूले यो फ्रेस जोडीलाई लिएर निकै चासो देखाएका छन् ।

फिल्मका निर्देशक रीत बोहोराको निर्देशन रहनेछ । उनका अनुसार, ‘कस्तुरी’ केवल परम्परागत मनोरञ्जनमा मात्र सीमित नभई रहस्य, सस्पेन्स र अपराधका गहिरो तहहरूलाई उजागर गर्ने पृथक कथावस्तुमा निर्माण भइरहेको छ । निखिल, वर्षा र निशाको साथमा यस फिल्ममा अनुभवी र नयाँ कलाकारहरूको बाक्लो उपस्थिति रहनेछ । मुख्य कलाकारहरूमा शेखर चापागाईं, निर्मल शर्मा, अर्जुन गुरुङ, भोलाराज सापकोटा, सबी थापा, प्रशान्त केसी, सन्तोष बानियाँ, सुवास बञ्जन, मिरा पण्डित, घनश्याम जोशी, श्रेया श्रेष्ठ, प्रतिष्ठा थापा र नेहा गौतम रहनेछन् ।

@parikalanewsofficial

यस्तै विशेष भूमिकामा गौरव पहारी र हेना नगरकोटी रहनेछन् । टेन इन्टरटेनमेन्ट प्रा.लि.को ब्यानरमा निर्माण भइरहेको यस सस्पेन्स–थ्रिलर फिल्मका निर्माता धिरज कुमार अग्रवाल हुन् भने सह–निर्माताको जिम्मेवारी अञ्जली चौधरीले सम्हालेकी छन् । निर्देशक बोहोराकै कथा रहेको ‘कस्तुरी’लाई आलोक शुक्लाले क्यामेरामा कैद गरिरहेका छन् । फिल्ममा प्रशान्त शिवाकोटीको संगीत, ललित बिष्टको प्रमुख सह–निर्देशन र दिलीप पन्तको निर्माण व्यवस्थापन रहेको छ ।