नारी दिवसमा फिल्म ‘टीका’को घोषणा, मुख्य भूमिकामा महेश, ऋचा र वर्षा

इटहरी/ नेपालको चुनावी माहौलले फिल्मका गतिविधि निष्क्रिय रहेको अवस्थामा मतगणना अन्तिम चरणमा पुग्दैगर्दा पुनः यो क्षेत्रमा फिल्मका गतिविधिले लय समात्न थालेको छ । यसैक्रममा एउटा नयाँ र दमदार कथा बोकेको फिल्मको घोषणा गरिएको छ । अन्तर्राष्ट्रिय नारी दिवसको विशेष अवसर पारेर महिला सशक्तिकरण, उनीहरूको संघर्ष र आत्मसम्मानको कथा बोल्ने फिल्म “टीका” को औपचारिक निर्माण घोषणा गरिएको छ ।

निर्माण टिमले एक टाइटल पोष्टर सार्वजनिक गर्दै यस फिल्मको घोषणा गरेको हो । यो फिल्ममा दर्शकले निकै रुचाइएको स्टारकास्ट देख्न पाउनेछन् । प्रतिभाशाली अभिनेता महेश त्रिपाठीका साथमा चर्चित अभिनेत्रीद्वय ऋचा शर्मा र वर्षा शिवाकोटी मुख्य भूमिकामा देखिँदैछन् । साथै, निर्मल शर्मा र बाल कलाकार आयुषी ढकालको अभिनयले फिल्मलाई झनै रोचक बनाउने पक्का छ । नेपाली समाजमा महिलाको पहिचान, मर्यादा र आत्मनिर्भरताको लडाइँलाई फिल्मले आफ्नो प्रमुख विषयवस्तु बनाउने बुझिएको छ ।

भविष्य खड्का फिल्मस् र थर्ड आइ आर्ट्सको संयुक्त ब्यानरमा निर्माण हुने यस फिल्ममा कथालाई पर्दामा उतार्न पर्दा पछाडिको टिम पनि निकै बलियो छ । चन्दन झा र शंकर कार्कीको कथा रहेको यस फिल्मको पटकथा रामकुमार श्रेष्ठले कोरेका हुन् । निर्देशक शंकर कार्कीले ‘एक्सन-कट्’ बोल्ने यस प्रोजेक्टलाई भविष्य खड्काले निर्माण गर्दैछन् । सुटिङ कहिले सुरु हुन्छ र फिल्म कहिले हलमा लाग्छ भन्नेबारे निर्माण पक्षले छिट्टै नै दर्शकलाई जानकारी दिने बताएको छ । हाललाई प्रदर्शन मिति नतोकिएको यो फिल्मले बक्स अफिसमा कस्तो जादु गर्ला, त्यो भने हेर्न बाँकी नै छ ।

@parikalanewsofficial