पुराना दलको ‘काला कर्तुत’प्रति आस्था राउतको आक्रोश, नयाँलाई भनिन्- ‘अब पनि राम्रो भएन भने ठीक हुँदैन’

इटहरी/ नेपालमा हाल भइरहेको चुनावी मतगणना र त्यसको प्रारम्भिक परिणामलाई लिएर चर्चित गायिका आस्था राउतले आफ्नो धारणा सार्वजनिक गरेकी छन् । सामाजिक सञ्जालमार्फत आफ्नो भनाइ राख्दै उनले पुराना राजनीतिक दलहरूप्रति असन्तुष्टि पोखेकी छन् भने नयाँ शक्तिहरूप्रति आशा र खबरदारी दुवै व्यक्त गरेकी छन् ।

पुराना दलहरूको कार्यशैलीले आम नागरिकमा निराशा छाएको उल्लेख गर्दै उनले लेखेकी छन्, “हाम्रो मनोबल पुराना दलहरूले गरेको व्यवहार अनि काला कर्तुतहरूले गर्दा घटेको थियो।” यद्यपि, पछिल्लो चुनावमा नयाँ अनुहार र दलहरूको उदयले भने नागरिकको मनोबल फेरि उच्च हुँदै गएको उनको भनाइ छ । नयाँ दल र उम्मेदवारहरूलाई लिएर उत्साहित देखिए तापनि गायिका राउतले उनीहरूलाई निरन्तर खबरदारी गर्नुपर्नेमा जोड दिएकी छन् । उनले नयाँ शक्तिहरूलाई सचेत गराउँदै भनेकी छन्, “यिनीहरूलाई पनि खबरदारी गर्ने हो । अब पनि राम्रो भएन भने चाहिँ ठीक हुँदैन ।”

@parikalanewsofficial

नेतृत्वमा आउन लागेका नयाँ अनुहारहरूलाई आम मतदाताको भोट र विश्वासको कदर गर्न उनले विशेष आग्रह गरेकी छन् । आफ्नो स्टाटसको अन्त्यमा उनले लेखेकी छन्, “हाम्रो भोट अनि विश्वासको इज्जत राख्नु, देशको लाज राख्नु ।”अहिले देशभर भइरहेको मतगणनामा स्वतन्त्र र नयाँ राजनीतिक दल अर्थात् राष्ट्रीय स्वतन्त्र पार्टीका उम्मेदवारहरूले उत्साहजनक मत ल्याइरहेको सन्दर्भमा गायिका राउतको यो भनाइ सार्वजनिक भएको हो ।