रास्वपालाई प्रियंका कार्कीको भोट: भन्छिन्, ‘अब की बार, बालेन सरकार’

इटहरी/ देशभर मतगणना जारी रहँदा र राष्ट्रिय स्वतन्त्र पार्टी (रास्वपा) ले अग्रता लिइरहेका बेला अभिनेत्री प्रियंका कार्कीले आफूले पनि ‘घण्टी’ मा मतदान गरेको खुलाएकी छन् । सामाजिक सञ्जालमा एक स्ट्याटस लेख्दै उनले आफ्नो मत कुनै आवेगमा नभई उम्मेदवारहरूको शिक्षा, क्षमता र दृष्टिकोणको गहिरो मूल्यांकन गरेर दिएको स्पष्ट पारेकी छन् ।

वर्षौंदेखिका लामा भाषण, मीठा वाचा र चुनावपछि हराउने प्रवृत्तिको अन्त्य चाहँदै कार्कीले केवल नारामा नभई ‘डेटा, योजना र जवाफदेहिताको भाषा’ बोल्ने नेतृत्वलाई समर्थन गरेको बताएकी छन् । नेपालले अहिले क्षमता, इमान्दारी र काम गर्ने इच्छाशक्ति भएको राजनीति खोजिरहेको भन्दै उनले परिवर्तनको सम्भावना र उज्यालो भविष्यका लागि रास्वपालाई रोजेको उल्लेख गरेकी छन् ।

@parikalanewsofficial

आफ्नो स्ट्याटसको अन्त्यमा उनले ‘अब की बार, बालेन सरकार’ लेख्दै रास्वपाका प्रधानमन्त्री पदका उम्मेदवार बालेन शाहप्रति पूर्ण समर्थन र विश्वास जनाएकी छन् । प्रियंकाको यो उद्घोषसँगै चुनावी मैदानमा बालेन शाहको प्रदर्शन पनि निकै सानदार देखिएको छ । काठमाडौंको मेयर पद त्यागेर रास्वपाबाट उम्मेदवार बनेका शाह यतिबेला देशकै सर्वाधिक चासोको केन्द्र झापा क्षेत्र नम्बर ५ मा ऐतिहासिक नतिजातर्फ लम्किरहेका छन् ।

पछिल्लो मतपरिणामअनुसार उनले नेकपा एमालेका अध्यक्ष तथा पूर्वप्रधानमन्त्री केपी शर्मा ओलीलाई भारी मतान्तरले पछाडि पार्दै आफ्नो अग्रता फराकिलो बनाएका छन् । युवा पुस्ता र चर्चित कलाकर्मीहरूको समेत बलियो साथ पाइरहेको रास्वपा र बालेन शाहको यो अग्रताले नेपाली राजनीतिमा ठूलो तरंग सिर्जना गरेको छ ।