‘आँ बाट आमा’ अझै पनि राताम्मे हुँदा चुनाव लाग्यो फिल्म ‘बिगुल’ र ‘श्री बुकुराे’लाई

इटहरी/ एकातिर फागुन २१ गते हुन लागेको निर्वाचनले देशको राजनीतिक माहोल तताएको छ भने अर्कोतिर नेपाली फिल्म हलहरूमा भने पछिल्ला रिलिज फिल्महरुमा सन्नाटा छाएको छ । पछिल्ला रिलिज फिल्महरुले दर्शकको चरम अभाव खेपिरहेका बेला यतिबेला धमाधम ती फिल्महरुलाई हलबाट उतारिन थालेका छन् । यसैको पछिल्लो शिकार बनेका छन् फिल्म ‘बिगुल’ र ‘श्री बुकुरो’ । यी दुवै फिल्म फागुन १ गतेदेखि रिलिज भएका थिए भने फागुन ६ गतेदेखि एकसाथ देशभरका हलहरूबाट बाहिरिँदैछन् ।

निर्माताहरूले अन्तरिम सरकारले गराउन लागेको आसन्न निर्वाचनलाई प्रदर्शन स्थगित गर्नुको कारण बताएका छन् । तर, यथार्थमा भने हलमा देखिएको ‘दर्शकको खडेरी’ नै फिल्म उतार्नुको मुख्य कारण रहेको बुझ्न सकिन्छ । पछिल्ला रिलिज फिल्मलाई बक्स अफिसमा दर्शकको न्यून उपस्थितिका कारण व्यापार खस्किएपछि निर्माताहरूले चुनावलाई सम्मानजनक बहिर्गमनको ‘बहाना’ बनाएका हुन भन्दा फरक नपर्ला ।

@parikalanewsofficial

यसको ज्वलन्त उदाहरण ‘आँ बाट आमा’ फिल्मलाई लिन सकिन्छ । २ फिल्मले चुनावको बाहाना बनाएर उतारिए पनि ‘आँ बाट आमा’ फिल्मलाई दर्शकले निरन्तर साथ दिइरहेका छन् । यो फिल्म देशभरका हलहरुमा राताम्मेका साथ प्रदर्शन भइरहेको छ । बिगुल र श्री वुकुरो फिल्मभन्दा अगाडि ‘द ब्ल्यु लाइट’ ले पनि हलबाट बिदा लिइसकेको छ । सो फिल्म माघ १६ गतेदेखि रिलिजमा आएपनि केहीदिनमै रिलिज स्थगित गरिएको थियो । यद्यपि, यस फिल्मको निर्माण पक्षले भने हार मानेको छैन । उनीहरूले फिल्मलाई प्राविधिक रूपमा थप स्तरीय बनाउने र आगामी दिनमा व्यापक प्रचारप्रसारका साथ नयाँ अवतारमा पुनः दर्शकमाझ ल्याउने वाचासहित प्रदर्शन रोकेका थिए ।