दुर्गमको व्यथामा फिल्म ‘जिरो डिग्री’को तिखो व्यङ्ग्य: सार्वजनिक भयो ‘अरे हो नेता जी’

इटहरी/ विकासको नाममा नेताले दिने ‘टालटुले’ आश्वासन र दुर्गम गाउँको तीतो यथार्थलाई एउटै फ्रेममा उनेर फिल्म ‘जिरो डिग्री’ निर्माण हुने भएको छ । छायाङ्कनको तयारीमा रहेको यस फिल्मले मङ्गलवार एउटा शक्तिशाली व्यङ्ग्यात्मक गीत ‘अरे हो नेता जी’ सार्वजनिक गर्दै सत्ता र शक्तिको प्रवृत्तिमाथि प्रश्न उठाएको हो ।

‘मुभिज् डिजीटेन्मेन्ट’ युट्युब च्यानलबाट सार्वजनिक गरिएको यस गीतमा अभिनेता विजय बराल र गायक अङ्कित बाबु अधिकारीको जुहारी सुन्न सकिन्छ । गीतमा जनताले विकास खोज्दा नेताले दिने गैरजिम्मेवार जवाफलाई युवराज काफ्लेका शब्द र अङ्कितको सङ्गीतले मर्मभेदी बनाएको छ । भिडियोमा विजय बरालको अभिनयले गीतको व्यङ्ग्यलाई अझै जीवन्त तुल्याएको छ । हेर्नुस् भिडियो ।

मेघौली फिल्म्सको प्रस्तुतिमा बन्न लागेको ‘जिरो डिग्री’ केवल एउटा फिल्म मात्र नभई नेपाली समाजको ‘डार्क कमेडी’ हो । सडक सुविधा नपुगेको एउटा विकट गाउँमा आमाबुवाको मृत्यु हुन्छ । विदेशमा रहेका सन्तान घर आइपुगुन्जेल शव सुरक्षित राख्न गाउँमा ‘डीप फ्रिज’ भित्र्याइन्छ । फ्रिज गाउँ पुगेपछि उत्पन्न हुने उथलपुथल र त्यसले खोल्ने समाजका विविध पत्रहरू लाई यो फिल्ममा कलात्मक ढङ्गले प्रस्तुत गरिनेछ ।

@parikalanewsofficial

राजन भुसालको कथा रहेको यस फिल्मलाई आकास बराल र साजन काफ्लेले निर्देशन गर्दैछन् । कार्यकारी निर्माता मोती कार्की रहेको यस फिल्ममा निशाल पौडेलको छायाङ्कन, चानस मगरको सम्पादन र रिक वेदको कला निर्देशन रहनेछ । फिल्मको पब्लिसिटी डिजाइन रोयल भीमसेनले गरेका छन् भने वितरणको जिम्मा कुबेर सिने डिस्ट्रिब्युसनले लिएको छ ।