इटहरी/ शारीरिक अपूर्णतालाई आत्मविश्वास र अठोटले जित्न सकिन्छ भन्ने प्रेरणादायी उदाहरण हुन्- रोशनी खड्का । सन् २०२५ को मिस नेपाल अडिसनमा भोगेको तितो अनुभव र त्यसपछि पाएको अपार जनसमर्थनबाट एकाएक चर्चामा आएकी उनै निडर रोशनी अब ठूलो पर्दामा डेब्यु गर्दैछिन् । नयाँ वर्षको छेको पारेर आगामी चैत २७ गतेबाट प्रदर्शनमा आउन लागेको फिल्म ‘डल्लेले इन्ट्री मार्यो’ मार्फत उनले आफ्नो अभिनय यात्रा थालेकी हुन् ।
महाशिवरात्रीको अवसर पारेर आइतबार निर्माण पक्षले यो फिल्मको ‘सेकेन्ड लुक’ पोस्टर सार्वजनिक गरेको छ । यसअघि सार्वजनिक गरिएको ‘फर्स्टलुक’मा प्रमुख अभिनेता सागर लम्साललाई मात्र प्रस्तुत गरिएको थियो भने यो दोस्रो पोस्टरमा सागरको साथमा अभिनेत्री रोशनीलाई पनि फिचर गरिएको हो । मोडलिङबाट करिअर सुरु गरेकी रोशनी जन्मजात एउटा हत्केलाविहीन छिन् ।
मिस नेपाल २०२५ को अडिसनमा जाँदा निर्णायक रचना गुरुङले उनको औपचारिक परिचय नै नसोधी सुरुमै हातको बारेमा प्रश्न गरेकी थिइन् । उक्त घटनाको भिडिओ क्लिप सामाजिक सञ्जालमा भाइरल भएपछि हजारौं दर्शकले रोशनीलाई निरुत्साहित गरेको भन्दै निर्णायकको कडा आलोचना गरेका थिए । तर, यी सबै घटनाक्रमलाई शक्तिमा बदलेर अघि बढेकी सुन्दरी तथा प्रतिभावान रोशनी आफ्नो अथक परिश्रम र लगावका साथ अभिनयमा जम्न तयार छिन् ।
@parikalanewsofficial
उनी आफ्नो यो पहिलो फिल्मप्रति निकै आशावादी रहेको बताउँछिन् । राजु गिरीले निर्देशन गरेको फिल्ममा उमेशकुमार बस्नेतको कथा रहेको छ भने पटकथा तथा संवाद लक्ष्मण सुवेदीको रहेको छ । फिल्मको मुख्य कलाकारहरुमा सागर लम्साल, रोशनी खड्का, रमेश बुढाथोकी, रवीन्द्र झा, हेमन्त बुढाथोकी, विशाल पहाडी, कैलाश रावल, रवि गिरी, ध्रुव कोइराला, सावित्री चिलुवाल, आशा पौडेल, लक्ष्मीनाथ तिमिल्सिना, ओसीन भट्टराई, सुष्मा केसी, रामहरी खड्का, राजु गिरी र सुचेन्द्र परियार रहेका छन् ।
यस्तै बालकलाकारमा काजोल, कंगना गिरी र रोनीश खड्का रहेका छन् । कार्यविनायक फिल्म्स र उषा फिल्म्सको प्रस्तुति रहेको यस फिल्मका निर्माताहरूमा सावित्रा चिलुवाल, आषिक बस्नेत, आदर्श बस्नेत, निर्मला बस्नेत र सरिता पुरी गिरी रहेका छन् । छायांकन श्याम तामाङ, संगीत अर्जुन पोखरेल, बाबुल गिरी र रिमेशकुमार थापा, कोरियोग्राफी केशवराज भट्ट, सम्पादन गौतमराज खड्काले गरेको हो भने नेशनल सिने ग्रुप नेपालले यसलाई वितरण गर्दैछ ।
Discussion about this post