विजय र वर्षाको आत्मीय पोस्टर सहित ‘मालती मंगले’को प्रदर्शन मिति सार्वजनिक

इटहरी/ नेपाली फिल्म पारखीहरूका लागि नयाँ वर्षको अवसरमा एउटा मौलिक प्रेमकथा पर्दामा आउने भएको छ । साङ्गीतिक क्षेत्रमा लामो समयदेखि एकछत्र राज गरिरहेका चर्चित गायक रामकृष्ण ढकालले निर्माण गरेको नयाँ नेपाली कथानक फिल्म ‘मालती मंगले’ आगामी वैशाख २५ गतेबाट देशभर प्रदर्शनमा आउने तय भएको छ ।

निर्माण पक्षले फिल्मको आधिकारिक प्रदर्शन मिति घोषणा गर्दै मुख्य कलाकारहरूको आत्मीय भाव झल्किने ‘फर्स्ट लुक पोस्टर’ पनि एकसाथ सार्वजनिक गरेको छ । सार्वजनिक पोस्टरले गाउँले परिवेशको मौलिकता र पात्रहरूबीचको गहिरो रसायनलाई छर्लङ्ग पारेको छ । विजय बस्यालले डिजाइन गरेको पोस्टरमा फिल्मका मुख्य पात्र विजय बराल र वर्षा राउतलाई निकै प्रेमिल मुद्रामा प्रस्तुत गरिएको छ ।

रातो रङ्गको आकर्षक ग्रामीण पहिरनमा सजिएकी वर्षाको काखमा विजयले सुविस्ताले टाउको राखेका छन् भने वर्षाले मुस्कुराउँदै उनलाई साथ दिएकी छिन् । पोस्टरको पृष्ठभूमि र पात्रहरूको हुलियाले फिल्मले नेपाली माटोको सुगन्ध र एउटा ‘अर्ग्यानिक’ ग्रामीण प्रेमकथालाई उठान गरेको प्रस्ट छनक दिन्छ ।

फिल्मका निर्देशक प्रकु पाण्डेयले ‘मालती मंगले’लाई नेपाली समाजको यथार्थपरक कथा बोकेको विशुद्ध पारिवारिक फिल्मको रूपमा अथ्र्याएका छन् । “यो परिवारको सबै उमेर समूहका सबै जना एकसाथ बसेर निर्धक्क हेर्न सकिने फिल्म हो । यसले हाम्रो समाजको एउटा बलियो पाटोलाई उजागर गर्ने इमानदार प्रयास गरेको छ,” निर्देशक पाण्डेयले भने ।

@parikalanewsofficial

यस फिल्मको कथा पनि निर्देशक पाण्डेय स्वयंले नै लेखेका हुन् भने पटकथा तथा संवादमा उनलाई संयोग गुरागाईँले सघाएका छन् । फिल्ममा विजय बराल र वर्षा राउतका साथमा मेक्सम गौडेल मुख्य भूमिकामा छन् । उनीहरूलाई प्रकाश घिमिरे, सरिता गिरी, सुस्मा निरौला, सुनिल तामाङ, उमेश सुनाम, शकु शाहलगायतका कलाकारहरूले साथ दिएका छन् ।

रानी म्युजिक इन्टरनेशनल प्रा.लि.को ब्यानरमा युनी इन्टरटेनमेन्टको सहकार्यमा निर्माण भएको फिल्ममा कार्यकारी निर्माताको रुपमा सागर ज्ञवाली छन् भने सह–निर्माताहरूमा बाबु सुवेदी, रविन श्रेष्ठ, वेदना कर्माचार्य श्रेष्ठ, पद्मावती गुरुङ र स्वीकृति बस्नेत रहेका छन् । महेश पौडेलको छायाङ्कन रहेको फिल्मलाई रोमी मोजेजले सम्पादन गरेका हुन् । यसमा कृष्ण भण्डारीको रङ्ग संयोजन र डिकेश खड्गीको ध्वनि मिश्रण रहेको छ । फिल्मको डिजिटल अधिकार ओएसआर डिजिटलले लिएको छ भने थिएटर वितरणको जिम्मा आरआर फिल्म्सले पाएको छ ।