इटहरी/ नेपाली फिल्म उद्योगलाई ‘वासुदेव’, ‘वसन्ती’ र ‘मसान’ जस्ता कालजयी फिल्म दिइसकेका वरिष्ठ फिल्मकर्मी नीर शाह लामो विश्रामपछि पुनः निर्देशनमा फर्किएका छन् । ठिक एक दशकको पर्खाइलाई बिट मार्दै उनले मनोवैज्ञानिक विषयवस्तुमा आधारित नयाँ फिल्म ‘कमला मिस’ मार्फत आफ्नो निर्देशकीय यात्रालाई पुनर्जीवन दिएका छन् ।
शुक्रबार ललितपुरको इमाडोलस्थित न्यु मिलेनियम स्कुल परिसरमा क्यामेरा र क्ल्यापबोर्डको विधिवत् शुभमुहूर्त गर्दै यस फिल्मको छायांकन सुरु गरिएको हो । प्रसिद्ध साहित्यकार विजय मल्लको कथामा आधारित ‘कमला मिस’ ले मानव मस्तिष्क र मनोविज्ञानका अत्यन्त सूक्ष्म आयामहरूलाई पर्दामा उतार्ने प्रयास गर्नेछ । यसको पटकथा तथा संवादलाई निर्देशक शाह स्वयंले प्रजल दुलाल र सुगम दुलालसँगको सहकार्यमा तयार पारेको हो ।
यस फिल्ममा निर्देशक नीर शाह आफैं पनि महत्त्वपूर्ण भूमिकामा प्रस्तुत हुँदै छन् । उनका साथमा नयाँ तथा पुराना पुस्ताका कलाकारहरूको जम्बो टोली यो फिल्ममा देखिनेछ । फिल्मको मुख्य कलाकारहरुमा बासना तिमिल्सिना, शिवम सराफ क्षेत्री, आरभ दाहाल, भावना मगर, सुशान्त कुमार श्रेष्ठ र जयन्त रेग्मी रहेका छन् । फिल्मको प्रस्तुतकर्ता स्मृति प्रतिष्ठानका विजय मल्ल रहेका छन् भने कार्यकारी निर्माता उमेश मल्ल र चैतन्य प्रधान, लाइन प्रोड्युसर पुष्कर लामा रहेका छन् ।
@parikalanewsofficial
वि.सं. २०२४ सालमा हिरासिंह खत्री निर्देशित फिल्म ‘परिवर्तन’ बाट अभिनय यात्रा थालेका शाहले नेपाली फिल्म जगतमा ५ दशकभन्दा लामो समय बिताइसकेका छन् । उनले हालसम्म ३ सयभन्दा बढी फिल्ममा आफ्नो सफल अभिनय पस्किसकेका छन् भने ‘वसन्त’, ‘राजमती’, र ‘सेतोबाघ’ जस्ता चर्चित फिल्महरूको सफल निर्देशन गरिसकेका छन् । पछिल्लो समय उनी अभिनीत फिल्म ‘परान’ ले बक्स अफिसमा करिब १८ करोड रुपैयाँको व्यापार गर्दै उत्कृष्ट व्यावसायिक सफलता हासिल गरेको थियो । अभिनयमा सदाबहार क्रेज कायम राख्न सफल शाहले अब ‘कमला मिस’ मार्फत नेपाली दर्शकमाझ फेरि एकपटक गहिरो वैचारिक संवाद स्थापित गर्ने विश्वास लिइएको छ ।
Discussion about this post