स्वस्तिमाको ‘नयाँ अवतार’ सहित ‘लालीबजार’ को टिजर र प्रदर्शन मिति सार्वजनिक

इटहरी/ दर्शकको मन जित्न सफल ब्यानर ‘षट्कोण आर्टस’ ले फेरि एकपटक मौलिक र अर्गानिक कथा पस्कने तयारी गरेको छ । निर्माण पक्षले फिल्म ‘लालीबजार’ को टिजर सार्वजनिक गर्दै यसलाई आगामी २०८३ साल वैशाख १८ गते दर्शकमाझ ल्याउने औपचारिक घोषणा गरेको छ ।

सार्वजनिक टिजरले फिल्मको मूल कथासार मात्र होइन, पात्रहरूको विविधतालाई पनि रोचक ढङ्गले प्रस्तुत गरेको छ । बर्दियाको राजापुर क्षेत्रको परिवेशमा खिचिएको यो फिल्मले त्यहाँको स्थानीय जनजीवन र लुकेका कथाहरूलाई पर्दामा उतार्ने सङ्केत गरेको छ ।

फिल्मको प्रमुख आकर्षणका रूपमा अभिनेत्री स्वस्तिमा खड्का र अभिनेता रवीन्द्रसिंह बानियाँ देखिएका छन् । विशेष गरी, स्वस्तिमा खड्कालाई यसपटक दर्शकले नितान्त फरक र चुनौतीपूर्ण भूमिकामा पाउनेछन् । उनको हुलिया र चरित्र चित्रणले टिजर रिलिजसँगै सिनेवृत्तमा चर्चा परिचर्चा सुरु गराएको छ । हेर्नुस् टिजर ।

साथमा समाइरा थापा, मुकुन्दकुमार श्रेष्ठ, अभय बराल, आशा पौडेल, गोविन्द सुनार जस्ता कलाकारहरूको अभिनयले फिल्मलाई जीवन्त बनाएको छ । यही फिल्मबाट विशाल देवकोटा र प्रशंसा सुवेदीले नेपाली फिल्म क्षेत्रमा आफ्नो यात्रा आरम्भ गर्दैछन् । फिल्मको कमान्ड लेखक तथा निर्देशक यम थापाले सम्हालेका छन् । उनलाई कथा वाचनमा सशक्त मानिने निर्देशक प्रदीप भट्टराईले पटकथा र संवादमा साथ दिएका छन् ।

@parikalanewsofficial

भट्टराई स्वयं फिल्मका कार्यकारी निर्माता समेत हुन् भने निर्माताको रूपमा म्याक्स दीपेश खत्री र रवीन्द्रसिंह बानियाँ रहेका छन् । क्रिएटिभ डिरेक्टर जेबी रुवाली रहेको ‘लालीबजार’ मा सुशन प्रजापतिको सिनेम्याटोग्राफीले बर्दियाको सौन्दर्य र कथाको मुडलाई क्यामरामा कैद गरेको छ । द्वन्द्वमा सम्राट बस्नेत, सम्पादनमा मित्रदेव गुरुङ र रङ्ग संयोजनमा रेनिश फागो रहेका छन् । रोयल भीमसेनले तयार पारेको पोस्टर र प्रचार सामग्रीले पनि फिल्मको स्तरलाई झल्काएको छ ।