‘छ माया छपक्कै’को सिक्वेल बन्ने, रोहित र दीपक-दीपाको टिमले २०८३ को दशैंमा रिलिज हुने

इटहरी/ बक्स अफिसमा ब्लकबस्टर व्यापार गर्न सफल फिल्म ‘छ माया छपक्कै’को दोस्रो श्रृंखला निर्माण हुने पक्का भएको छ । दर्शकहरुको अत्याधिक माग र चर्चाका बीच निर्माण पक्षले औपचारिक रुपमा ‘छ माया छपक्कै २’ निर्माणको घोषणा गरेको हो ।

सोमबार काठमाडौंमा एक भेटघाटका बीच फिल्मका निर्माता रोहित अधिकारी र दीपकराज गिरी तथा दीपाश्री निरौलाको समूह बीच फिल्म निर्माण सम्बन्धी औपचारिक लिखित सम्झौता सम्पन्न भएको छ । यो सम्झौतासँगै नेपाली फिल्म क्षेत्रका दुई शक्तिशाली ब्यानरको पुन: सहकार्य पक्का भएको हो ।

निर्माण पक्षले फिल्मको रिलिज मिति समेत घोषणा गरेको छ । सम्झौता अनुसार यो बहुप्रतिक्षित फिल्म २०८३ सालको बडा दशैंमा प्रदर्शनमा आउनेछ । दीपक-दीपाको टिमले प्रायः आफ्ना ठूला फिल्महरू दशैंको अवसर पारेर रिलिज गर्दै आएको छ, र ‘छ माया छपक्कै २’ ले पनि सोही परम्परालाई निरन्तरता दिने भएको छ ।

@parikalanewsofficial

स्मरण रहोस्, यही मितिमा अर्को बहुप्रतीक्षित फिल्म ‘१२ गाँउ २’ पनि रिलिज हुने चर्चा छ । यदि यी २ फिल्म यही मितिमा रिलिज हुने पक्का भयो भने रोचक र महाभिडन्त हुने देखिन्छ । पहिलो श्रृंखलाको अपार सफलतापछि दर्शकहरुमा ‘छ माया छपक्कै २’ प्रति ठूलो उत्सुकता जागेको छ । कथावस्तु र अन्य कलाकारहरुको बारेमा भने निर्माण पक्षले बिस्तारै जानकारी दिने बताएको छ ।