ब्रेकअपको चर्चाबीच ‘रमिताको पिरती’मा आनासँग गुञ्जियो सुशान्तको स्वर

इटहरी/ केही समययता अभिनेत्री आना शर्मा र गायक सुशान्त केसीले इन्स्टाग्राममा एक–अर्कालाई ‘अनफलो’ गरेपछि उनीहरूको प्रेम सम्बन्ध टुटेको हल्लाले बजार तताएको थियो । तर, यही व्यक्तिगत चर्चाका बीच यो जोडीले आफ्नो व्यावसायिक र हार्दिक सम्बन्धलाई भने कायमै राखेको सन्देश दिएका छन् । शुक्रबारदेखि प्रदर्शनमा आएको आना शर्मा अभिनित फिल्म ‘रमिताको पिरती’ को प्रचारका लागि गायक सुशान्त केसीले साथ दिएका छन् ।

फिल्म रिलिजको चौथो दिन पारेर सुशान्तले आफ्नै स्वर तथा संगीत रहेको ‘तिम्रै छेऊमा’ बोलको गीत फेसबुक र इन्स्टाग्राममार्फत सार्वजनिक गरेका हुन् । ब्रेकअपको हल्ला चलिरहँदा सुशान्तले आनाको मुख्य भूमिका रहेको फिल्ममा गीत गाउनु र सामाजिक सञ्जालमा फिल्म राम्रो बनेको प्रतिक्रिया दिँदै शुभकामना दिनुले उनीहरूबीचको सम्बन्ध अझै सौहार्दपूर्ण रहेको संकेत गरेको छ । सार्वजनिक गरिएको गीतको भिडियोमा भने आना शर्मा र अभिनेता धिरज मगरबीचका प्रेमिल र हार्दिक क्षणहरूलाई कलात्मक रूपमा कैद गरिएको छ ।

@parikalanewsofficial

प्रदर्शनको सुरुवाती दिनदेखि नै चर्चा बटुलिरहेको यस फिल्मले बक्स अफिसमा पनि सकारात्मक गति लिएको छ । निर्माता सागर लम्सालका अनुसार शुक्रबारको तुलनामा शनिबार र त्यसपछिका दिनमा दर्शकको संख्या बढ्दो क्रममा छ । अर्का निर्माता सुवास कोइरालाले ‘वर्ड अफ माउथ’ बलियो भएकाले बिदाका दिनहरूमा व्यापारमा अझ उछाल आउने विश्वास व्यक्त गरेका छन् । सुदिप्ताको लेखन तथा निर्देशन रहेको यो फिल्मले ‘रमिता’ नामकी युवतीको सम्बन्धका विभिन्न आयामहरूको कथा भन्छ ।

विशेषगरी, मुख्य भूमिकामा रहेकी आना शर्माको अभिनयलाई दर्शकले ‘अहिलेसम्मकै उत्कृष्ट’ भन्दै सामाजिक सञ्जालमा तारिफ गरिरहेका छन् । फिल्ममा आना र धिरजका अलावा समिर श्रेष्ठ, विनय श्रेष्ठ र रेनु योगी लगायतका कलाकारहरूको मुख्य अभिनय रहेको छ । फिल्मलाई शिशिर विसङखेले छायांकन गरेका हुन् भने सुनिल शिवभक्तिले सम्पादन गरेका छन् । व्यक्तिगत जीवनको चर्चालाई पन्छाउँदै आना र सुशान्तले देखाएको यो व्यावसायिकताले फिल्म ‘रमिताको पिरती’ प्रति दर्शकको कौतुहलता अझ बढाएको छ ।