अभिनेता सुनिल थापाको निधनमा बलिउड अभिनेत्री प्रियंका चोपडाको भावुक स्ट्याटस

इटहरी/ नेपाली फिल्म क्षेत्रका वरिष्ठ अभिनेता सुनिल थापाको निधनले नेपाली फिल्म क्षेत्र मात्र नभई भारतीय फिल्म जगतलाई पनि स्तब्ध बनाएको छ । यसै क्रममा बलिउड तथा हलिउड अभिनेत्री प्रियंका चोपडाले थापाको निधनप्रति गहिरो दुःख व्यक्त गरेकी छिन् । सामाजिक सञ्जालमा एक भावुक स्ट्याटस लेख्दै प्रियंकाले सुनिल थापालाई आफ्नो ‘कोच सर’ को रूपमा सम्झिएकी छिन् ।

यी दुई कलाकारले सन् २०१४ मा प्रदर्शित सुपरहिट फिल्म ‘मेरी कोम’ मा एकसाथ काम गरेका थिए, जहाँ सुनिल थापाले प्रियंकाको बक्सिङ कोचको भूमिका निर्वाह गरेका थिए । फिल्मको एक क्लिप सामाजिक सञ्जालमा राख्दै प्रियंकाले आफ्नो जीवनको सबैभन्दा कठिन समयमा थापाले दिएको साथलाई स्मरण गरेकी छिन् । उनले लेखेकी छिन्, “तपाईं सधैं मेरो ‘कोच सर’ रहिरहनुहुनेछ ।”

आफ्ना पिताको निधन लगत्तैको समयमा छायांकनका क्रममा थापाले दिएको ढाडस सम्झिँदै उनले भनेकी छिन्, “जतिबेला मैले भर्खरै मेरो बुवालाई गुमाएको थिएँ, तपाईंले मलाई सम्हाल्नुभयो । तपाईंले मलाई माया गर्नुभयो र आफूलाई थाहै नभई कयौं कठिन दिनहरू पार गर्न मलाई मद्दत गर्नुभयो ।”
प्रियंकाले थापाको न्यानो व्यवहार र हाँसो सधैं आफ्नो स्मृतिमा रहने उल्लेख गरेकी छिन् । “धेरै चाँडो जानुभयो तर कहिल्यै बिर्सिइने छैन,” उनले लेखेकी छिन् ।

@parikalanewsofficial

आफू भित्रैदेखि टुटेको समयमा थापाले देखाएको स्नेहप्रति कृतज्ञता व्यक्त गर्दै उनले शोकाकुल परिवारप्रति समवेदना प्रकट गरेकी छिन् । ‘मेरी कोम’ फिल्ममा सुनिल थापाको अभिनयको भारतमा समेत निकै प्रशंसा भएको थियो । उनको निधनले एक सशक्त अभिनेता गुमाएको भन्दै फ्यान तथा शुभचिन्तकहरूले श्रद्धाञ्जली अर्पण गरिरहेका छन् । शुक्रबार बेलुका उनको हृदयघातका कारण निधन भएको थियो ।