इटहरी/ बालबालिकाहरूको प्रतिभा प्रस्फुटन गराउने उद्देश्यले आयोजित ‘मिस्टर एण्ड मिस लिटिल पुर्बेली सिजन-२’ को ग्रान्ड फिनाले भोलि शनिबार हुँदैछ । ओपन स्पेस प्रा.लि. को आयोजनामा इटहरीस्थित दुर्गा पार्टी प्यालेसमा साँझ हुने यो विशेष कार्यक्रमका लागि सम्पूर्ण तयारी पूरा भएको छ ।
अन्तिम प्रतिस्पर्धामा ३९ जना साना बालबालिकाहरूले आफ्नो प्रतिभा देखाउँदै छन् ।
ग्रान्ड फिनाले नजिकिएसँगै विजेताको ताज कसले पहिरिएला भन्ने कुरा अहिले कौतुहलताको विषय बनेको छ । केबल र्याम्प वाक मात्र होइन, सर्वाङ्गीण विकासको पाठशाला यो प्रतियोगितालाई आयोजकले केवल सौन्दर्य वा फेसनसँग मात्र नजोडी बालबालिकाको व्यक्तित्व विकासको एउटा महत्वपूर्ण मञ्चको रूपमा व्याख्या गरेका छन् ।
ओपन स्पेस प्रा.लि. का निर्देशक सरोज श्रेष्ठ भन्छन्, “यो प्रतियोगिता बालबालिकाको बौद्धिक क्षमता निखार्ने र उनीहरूलाई भविष्यको कला तथा फेसन क्षेत्रका लागि तयार पार्ने एउटा पाठशाला हो । हामीले यसलाई केवल र्याम्प वाकमा सीमित नराखी उनीहरूको सर्वाङ्गीण विकासमा केन्द्रित गरेका छौं ।”
प्रतियोगितामा सहभागी बालबालिकाहरूलाई फिनालेका लागि पूर्ण रूपमा तयार पारिएको छ । कोरियोग्राफर सुभेक्षा कार्कीले प्रतिस्पर्धीहरूलाई आकर्षक क्याटवाकको प्रशिक्षण दिएकी छन् । यसका साथै, बालबालिकाको आत्मविश्वास बढाउन र मञ्चमा निर्धक्क बोल्न सक्ने बनाउन पब्लिक स्पिकिङ, प्रश्नोत्तर कला र शारीरिक तथा मानसिक स्वास्थ्यका लागि योगाको समेत तालिम दिइएको आयोजकले जनाएको छ ।
@parikalanewsofficial
कार्यक्रमलाई भव्य बनाउन आयोजक संस्थाकी सिइओ सजिना श्रेष्ठ, निर्देशक सरोज श्रेष्ठ, कोरियोग्राफर सुभेक्षा कार्की र मिडिया कोअर्डिनेटर सुवास संकल्प लगायतको टिम व्यवस्थापनमा खटिएको छ । शनिबार हुने ग्रान्ड फिनालेबाट छानिने विजेताले उपाधि सहित नगद पुरस्कार र आकर्षक गिफ्ट ह्याम्परहरू प्राप्त गर्नेछन् । भोलि साँझ हुने यो ‘महाभिडन्त’ मा ३९ जना मध्ये कुन बाल-प्रतिभाले बाजी मार्नेछन्, त्यो भने हेर्न बाँकी नै छ ।
Discussion about this post