मेरो डान्स युनिभर्सको उपाधी खुशी कार्कीलाई, प्राप्त गरिन् १ करोड नगद पुरस्कार

इटहरी/ नेपालको सबैभन्दा ठूलो धनराशी १ करोड पुरस्कार राखिएको दुई रियालिटी सो ‘मेरो भ्वाईस यूनिर्भस’ र ‘मेरो डान्स यूनिर्भस’को ग्राण्ड फिनालेबाट डान्स तर्फ खुशी कार्की बिजेता भएकी छन् । उनले बिजेता भएसंगै १ करोड नगद पुरस्कार र अन्य पुरस्कारहरु प्राप्त गरेकि छन् । फर्स्ट रनरअप देवि गर्बुजा मगर भएकी छन् भने उनले ३० लाख नगद प्राप्त गरेकी छन् । सेकेन्ड रनरअप मिङ्मा टि लेप्चा हुँदा उनले २० लाख नगद प्राप्त गरेका छन् ।

यस्तै फिनालेबाट थर्ड रनरअप स्वस्तिक अर्याल र फोर्थ रनरअप निशान सुस्लिङ मगर भएका छन् । यस्तै फिनालेबाट कल्चरल ग्रुप डान्समा नेपाल पुलिस बिजेता भएको छ भने नगद २० लाख पुरस्कार स्वरुप प्राप्त गरेको छ । यस्तै फर्स्ट रनरअप धरान नृत्यकला प्रतिष्ठान भएको छ भने नगद १० लाख पुरस्कार स्वरुप प्राप्त गरेको छ । सेकेन्ड रनरअप भारती पिक्चर्स ग्रुप भएको छ भने नगद ५ लाख प्राप्त गरेको छ । प्रतियोगिताको अवधिभर ३० ओटा कल्चरल डान्स प्रस्तुत भएको थियो ।

आज शनिबार ललितपुरमा सम्पन्न भएको ग्रान्ड फिनालेको प्रमुख अतिथिको रुपमा प्रधानमन्त्री पुष्पकमल दाहाल ‘प्रचण्ड’ रहेका थिए भने सभापतित्वमा आयोजक संस्थाका अध्यक्ष डिल्ली अधिकारी रहेका थिए । ग्राण्ड फिनाले ललितपुरको गोदावारी स्थित अन्तर्राष्ट्रिय सम्मेलन केन्द्रमा बेलुकी पाँच बजे देखि सुरुभएको थियो । एलन श्रेष्ठको निर्देशनमा निर्मित यि दुवै कार्यक्रमको प्रसारण ३ महिनासम्म ३० एपिसोड भएको थियो जसमा संसारभर छरिएर रहेका नेपाली र नेपालभाषीको सहभागिता रहेको थियो । मेरो डान्स युनिभर्सको निर्णायकमा अभिनेत्री मिथिला शर्मा, शंकर विसी, दीलिप रायमाझी, प्रियंका कार्की, केकी अधिकारी र नरमान राई र गेष्ट जजमा ऋचा शर्मा थिईन् भने होस्टमा नरेश भट्टराई र सुनिता गुरुङले लिड गरेका थिए ।