अभिनयले पर्दामा रुवाउने विजय बराल, सत्तालाई प्रश्न गर्दै गीत गाए

इटहरी/ बक्स अफिसमा ‘पूर्णबहादुरको सारङ्गी’ रेट्दै दर्शकलाई भावविह्वल बनाएका अभिनेता विजय बराल अब फरक रूपमा प्रस्तुत भएका छन् । रिलको पर्दामा आफ्नो अभिनयको जादु चलाइसकेका विजयले अब आफ्नो ‘बुलन्द आवाज’ मार्फत खबरदारीको बिगुल फुकेका छन् । उनी पहिलोपटक गायकको रूपमा देखिएका छन्, त्यो पनि प्रेमकथा वा रमाइलो गीत लिएर होइन– देशको बिग्रँदो अवस्थामाथि प्रश्न उठाउँदै ।

विजयले आफ्नो गायन डेब्युका लागि ‘विधिको शासन’ बोलको गीत रोजेका छन् । शौरभ कार्कीको शब्द र प्रशान्त शिवाकोटीको संगीत रहेको यो गीतलाई मनोरञ्जनभन्दा पनि वर्तमान राजनीतिक विसंगति विरुद्धको एउटा सशक्त ‘ध्वनि’ मानिएको छ । गीतले व्यक्तिको सनक र मनमौजी शैलीले होइन, देश पद्धति र विधिले चल्नुपर्छ भन्ने सन्देश बोकेको छ । विशेषगरी, गत भदौ २३ र २४ गते काठमाडौंमा भएको जेनजी आन्दोलनको राप र तापलाई गीतले मुख्य विषयवस्तु बनाएको छ । हेर्नुस् गीत ।

गीतको अडियो जत्तिकै यसको भिडियो पनि ओजनदार बनेको छ । मनिष राउतको कन्सेप्टमा तयार भएको भिडियोलाई एक सांगीतिक प्रस्तुति भन्दा पनि नेपालको राजनीतिक इतिहासको ‘भिडियो दस्तावेज’ भन्न सकिन्छ । भिडियोमा २०४० सालको आन्दोलन, २०६२/६३ को जनआन्दोलन हुँदै हालैका युवा विद्रोहका वास्तविक फुटेजहरू प्रयोग गरिएको छ । सडकमा पोखिएको नागरिकको आक्रोश र प्रहरी दमनका दृश्यहरूले गीतलाई थप मर्मस्पर्शी बनाएका छन् ।

आफ्नो नयाँ भूमिकाबारे प्रष्ट पार्दै विजय भन्छन्, “म खासमा गायक होइन । तर, यो गीतको भाव र मर्ममा मेरो स्वर सुहाउँछ भनेर साथीहरूले हौसला दिनुभयो । यो गीत कुनै व्यक्ति विशेषको विरोध वा समर्थनमा नभई समग्र सत्ता र प्रणालीप्रतिको सटायर हो ।” उनले खरानी भइरहेका नेपाली सपनाहरूमा फेरि आशाको दियो बाल्न यो गीतले सघाउ पुर्‍याउने विश्वास व्यक्त गरेका छन् ।

@parikalanewsofficial

एकातर्फ गीत मार्फत विधिको शासन खोजिरहेका विजय, अर्कोतर्फ अभिनय कर्ममा पनि उत्तिकै सक्रिय छन् । उनी हालै ब्लकबस्टर निर्देशक सरोज पौडेलको आगामी फिल्म ‘सिन्दुरे जात्रा’ मा औपचारिक रूपमा अनुबन्धित भएका छन् । इतिहासकै सर्वाधिक कमाउने फिल्म ‘पूर्णबहादुरको सारङ्गी’ को टिम पुनः एकपटक यस फिल्ममा दोहोरिने भएको छ । विजयको जोडीका रूपमा अभिनेत्री अञ्जना बराइली फाइनल भएकी छिन् ।