फिल्म ‘मायाको गाउँ’मा समावेस टिकटकमा भाइरल ‘सबले भन्छन् जिन्दगी’ गीत सार्वजनिक

इटहरी/ पछिल्लो समय सामाजिक सञ्जाल टिकटकमा एउटा गीतका क्लिपहरू निकै छाइरहेका छन् । दर्शकले अडियो रुचाएको त्यही चर्चित गीत ‘सबले भन्छन् जिन्दगी त..’ को आधिकारिक भिडियो सोमबार सार्वजनिक गरिएको छ ।
आगामी फिल्म ‘मायाको गाउँ’ मा समावेश यो गीत साइराम पिक्चर्समार्फत दर्शकमाझ ल्याइएको हो ।

प्रेम, धोका र पीडाको गहिरो भाव समेटिएको गीतमा प्रोसेस पाण्डेको स्वर रहेको छ भने शब्द अनिल खनाल र संगीत अर्जुन पोखरेलको छ । राजु गिरीको कोरियोग्राफी रहेको गीतको भिडियोमा त्रिबिक्रम सिंह राणा, ओसिन भट्टराई, राजु गिरी, नारायण पराजुली, र बिनयराज पौडेललगायतले अभिनय गरेका छन् । हेर्नुस् गीत ।

गीतको भाव अनुसार कलाकारहरूले प्रेम सम्बन्धमा आउने उतारचढावलाई जीवन्त अभिनयमार्फत प्रस्तुत गरेका छन् । प्रेमकथानक विषयवस्तुमा निर्माण भएको फिल्म ‘मायाको गाउँ’ मा त्रिबिक्रम र ओसिनका अलावा शीतल केसी, सरु कार्की, अम्बिका थापा, लक्ष्मीनाथ तिमिल्सिना, रमेश अधिकारी, माधवा खनाल, किमजोङ बोस, हरिबहादुर घर्ती मगर, रितिका मगर, कृष्ण गदाल लगायतको जम्बो टोलीको अभिनय छ ।

@parikalanewsofficial

कमला पराजुली निर्माता रहेको यस फिल्मको निर्देशन ‘कमला फिल्मस् टिम’ द्वारा नै गरिएको हो । प्राविधिक पक्षमा रामेश्वर हुमागाइँको छायांकन, श्याम रानाको सम्पादन, र बिनोद बमको पब्लिसिटी डिजाइन रहेको छ । फिल्मको कलर ग्रेडिङ भने पेन सिजर्स एण्ड रेन्डर्सका गौतमराज खड्काले गरेका हुन् । निर्मात्री पराजुलीका अनुसार फिल्मको प्रदर्शन मिति २०८३ सालको सुरुवाती महिनाका लागि तय गरिएको छ ।