स्टारडमको भीडमा ‘पर्फर्मेन्स’ को खोजी: एकसाथ देखिँदै बेनिशा, अर्पण र महेश

इटहरी/ स्टारडमको पछि कुदिरहेको नेपाली फिल्म बजारमा कहिलेकाहीँ यस्ता प्रोजेक्टहरू आउँछन्, जसले ‘पर्फर्मेन्स’ र ‘आर्ट’को भोक भएका दर्शकलाई राहत दिन्छन् । यही माघ १६ गतेबाट प्रदर्शनमा आउन लागेको चलचित्र ‘द ब्ल्यू लाइट’ले यस्तै अपेक्षा जगाएको छ । यो केवल एउटा नयाँ फिल्म मात्र होइन, अभिनयमा आफूलाई अब्बल साबित गरिसकेका अनुभवी कलाकारहरूको ‘संगम’ पनि हो ।

यो फिल्मको सबैभन्दा बलियो पक्ष यसको कास्टिङ देखिएको छ । ‘ब्लाइन्ड रक्स’ मार्फत आफ्नो अभिनय क्षमता देखाइसकेकी अभिनेत्री बेनिशा हमाल, ‘हल्कारा’ बाट अभिनेताको गहिराइ नापेका महेश त्रिपाठी, जो हालको सुपरहिट फिल्म ‘परान’ मा पनि पनि अभिनय गरेर तारिफ बटुलेका, र पर्दामा आफ्नो ‘एटिच्युड’ र अभिनयले जादु छर्ने अर्पण थापा एकसाथ देखिँदैछन् ।

यति मात्र होइन, यो टिममा आयुष्मान देशराज जोशी र सृष्टि श्रेष्ठ जस्ता लोकप्रिय अनुहारहरूको उपस्थिति पनि छ । साथमा सुरक्षा इटानी, ग्रिस्मा कटुवाल र सहारा शर्माको अभिनयले फिल्मलाई थप मजबुत बनाएको छ । गत शुक्रबार रिलिज भएको ट्रेलरले अहिले युट्युब र सामाजिक सञ्जालमा राम्रो हाइप सिर्जना गरेको छ । ट्रेलरको सुरुवातदेखि नै देखिने अँध्यारो र रहस्यमयी परिवेशले यो एउटा पूर्ण ‘साइकलोजिकल थ्रिलर’ हो भन्ने स्पष्ट पार्छ ।

@parikalanewsofficial

ट्रेलरमा अभिनेत्री बेनिशालाई ‘माया’ नामक पात्रको रूपमा देखाइएको छ, जो एक्लोपन र कुलतको दलदलमा फसेकी छिन् । प्रेम, धोका र बदलाको वरपर घुमेको कथामा अर्पण थापाको रहस्यमयी भूमिका र प्रहरी सोधपुछका दृश्यले दर्शकको दिमागमा अनेक प्रश्न उब्जाएको छ- आखिर ‘विक्रम’ को हो ? र ‘द ब्ल्यू लाइट’ को अर्थ के हो ?

धेरै दर्शकले यसलाई नेपाली फिल्ममा “नयाँ स्वाद र फरक विधाको आगमन” भन्दै सकारात्मक प्रतिक्रिया दिएका छन् ।स्काइफल पिक्चर्सको प्रस्तुति रहेको यो फिल्मलाई बलिराम चौहानले निर्देशन गरेका हुन् । यो उनको डेब्यु निर्देशन भए पनि उनी नयाँ भने होइनन् । थुप्रै फिल्ममा ‘चिफ एडी’ को रूपमा काम गरिसकेका र ‘बलिदान’ जस्तो ठूलो प्रोजेक्टको निर्देशकीय टिममा रहेका चौहान आफ्नो काममा परिपक्व देखिन्छन् ।

निर्देशक चौहान भन्छन्, “हामीले देखाउन खोजेको विषयवस्तु नयाँ पक्कै पनि छैन । तर हामीले त्यही कुरालाई नयाँ शैलीमा देखाएका छौँ । पात्रका संवेग र भावनाहरू उच्च संवेदनशील छन्, जसले दर्शकलाई फरक अनुभव दिनेछ ।” यो फिल्ममा चर्चित छायाकार नरेन्द्र मैनाली र अभिनेत्री बेनिशा हमाल स्वयंले कार्यकारी निर्माताको जिम्मेवारी सम्हालेका छन् भने भोलानाथ कटुवाल र रमन ग्रे सह-निर्माताको रूपमा रहेका छन् । गम्भीर विषयवस्तु र सस्पेन्स रुचाउने दर्शकका लागि यो माघ १६ विशेष हुने संकेत ‘द ब्ल्यू लाइट’ ले दिएको छ ।