महासंघले गर्यो कोशी प्रदेशका १ सय बढी चलचित्रकर्मीलाई ३ क्याटोगरीमा परिचयपत्र वितरण

इटहरी/ फिल्मलाई केवल मनोरञ्जनको साधन मात्र नभई प्रदेशको पर्यटन प्रवर्द्धन र आर्थिक समृद्धिको मुख्य आधार बनाउने उद्देश्यसहित कोशी प्रदेशमा एक ऐतिहासिक कार्यक्रम सम्पन्न भएको छ । शनिबार मोरङको सुन्दरहरैंचा–२, मृगौलीयामा सम्पन्न वृहत् फिल्मकर्मी भेलामा प्रदेश सरकार र निजी क्षेत्रको सहकार्यमा फिल्मकर्मीका लागि विशेष सहुलियत र पूर्वाधार विकासको योजना सार्वजनिक गरिएको हो ।

नेपाल चलचित्रकर्मी महासंघ कोशी प्रदेशद्वारा आयोजित ‘कोशी पर्यटन प्रवर्द्धनमा सिनेमा र कलाकार’ विषयक अन्तरक्रिया तथा सम्मान कार्यक्रममा बोल्दै प्रमुख अतिथि एवं कोशी प्रदेशका पर्यटन, वन तथा वातावरण मन्त्री भिम पराजुलीले प्रदेशभित्र फिल्म छायांकनलाई सहजीकरण गर्न सरकार तयार रहेको प्रतिबद्धता व्यक्त गरे ।

कार्यक्रमलाई सम्बोधन गर्दै मन्त्री पराजुलीले भने, “कलाकार र सिनेमाले बोक्ने सन्देश कुनै पनि विज्ञापनभन्दा शक्तिशाली हुन्छ। कोशी प्रदेशका पर्यटकीय गन्तव्यलाई पर्दामा उतारेर विश्वसामु चिनाउन म चलचित्रकर्मीलाई आग्रह गर्दछु। यसका लागि प्रदेश सरकारले आवश्यक नीतिगत सहयोग र सहजीकरण गर्नेछ ।” मन्त्री पराजुलीले मृगौलीयामा महासंघको पहलमा निर्माण हुन लागेको ‘फिल्म सुटिङ भवन’ ले कोशी प्रदेशको कला क्षेत्रमा नयाँ आयाम थप्ने विश्वास व्यक्त गर्दै यस कार्यले आफूलाई उत्साहित बनाएको बताए।

@parikalanewsofficial

महासंघको पहलमा कोशी प्रदेशका फिल्मकर्मीहरूको जीवनस्तर उकास्न र उनीहरूको परिवारलाई राहत दिन विभिन्न संस्थाले महत्वपूर्ण घोषणा गरेका छन् । जस अन्तर्गत ईटहरीस्थित नोबेल एकेडेमीले कोशी प्रदेशका फिल्मकर्मीका छोराछोरीलाई कक्षा १ देखि १० सम्मको अध्ययनमा २५ प्रतिशत छुट दिने भएको छ भने नेपाल हेभी ड्राइभिङ स्कुल इटहरीले सवारी सिक्न चाहने फिल्मकर्मीलाई २५ प्रतिशत छुट दिने भएको छ ।

यस्तै ह्वाइट हाउस इन्टरनेसनल इन्स्टिच्युट अफ होटल म्यानेजमेन्टले ‘डिप्लोमा इन होटल म्यानेजमेन्ट’ अध्ययन गर्नेलाई २५ प्रतिशत छुट दिने घोषणा गरेको छ । समारोहमा फिल्म क्षेत्रमा लामो समयदेखि योगदान पुर्‍याएका विशिष्ट व्यक्तित्वहरूलाई सम्मान गरिएको थियो । सम्मानित हुनेहरूमा सुपरहिट फिल्म ‘परान’ का लेखक तथा निर्देशक दिपक आचार्य, महासंघको भवन निर्माणका लागि जग्गा दान गर्ने फ्यूचर रियल स्टेट हाउजिङका प्रबन्ध निर्देशक यम लामा, वरिष्ठ फिल्मकर्मीहरू राजेन्द्र श्रेष्ठ र निर्देशक, नेपाल हेभी ड्राइभिङका शिव श्रेष्ठ तथा कलाकार संगिता प्रधान रहेका छन् ।

साथै, स्वास्थ्य क्षेत्रबाट चलचित्रकर्मीलाई सहयोग पुर्‍याएको भन्दै विराटनगरस्थित नोबेल मेडिकल कलेजलाई पनि सम्मान गरियो । कार्यक्रममा कोशी प्रदेशका १ सयभन्दा बढी सक्रिय फिल्मकर्मीहरूलाई परिचय पत्र समेत वितरण गरिएको थियो । कार्यक्रममा विशिष्ट अतिथिका रूपमा नेपाली फिल्म क्षेत्रका सदाबहार नायक शिव श्रेष्ठ, वरिष्ठ निर्देशक रमेश बुढाथोकी, कुमार कट्टेल जिग्री, गजित बिष्ट र आदिवासी जनजाति महासंघ बेलायतका अध्यक्ष मेजर रिटायर्ड योगेश कोयि राईको उपस्थिति रहेको थियो । उनीहरूले कोशी प्रदेशका चलचित्रकर्मीहरूले देखाएको एकता र सहकार्यको मोडलले केन्द्रलाई समेत झकझकाएको टिप्पणी गरे ।