ईटहरी/ ‘चकलेटी हिरो’ को छवि बनाएका नायक आकाश श्रेष्ठले अन्ततः पुनः ठूलो पर्दामा धमाकेदार पुनरागमन गर्ने भएका छन् । लामो समयदेखि म्युजिक भिडियोमा मात्र सीमित रहेका श्रेष्ठ अब भने पूर्ण एक्सन अवतारमा दर्शकमाझ फिल्ममा कमब्याक गर्ने पक्का भएको हो ।
फिल्मको मुख्य भूमिकाका लागि बलियो कथाको पर्खाइमा रहेका आकाशले निर्देशक रुपेश तामाङको नयाँ प्रोजेक्टमार्फत कमब्याकको तयारी थालेका हुन् । ‘जय शम्भु’ र ‘दान्भी’ जस्ता एक्सन फिल्म बनाएर चर्चामा आएका निर्देशक तामाङले यसपटक आकाशलाई यसअघि कहिल्यै नदेखिएको ‘रफ एण्ड टफ’ भूमिकामा प्रस्तुत गर्ने योजना बनाएका छन् । यस सहकार्यका लागि माघे संक्रान्तिको शुभसाइत पारेर आजै निर्माण पक्ष र आकाशबीच कागजी सम्झौता सम्पन्न भएको छ ।
जुना फिल्मस्को ब्यानरमा निर्माण हुने सो फिल्मको नाम भने तय भइसकेको छैन । यो फिल्मको कथा सुमन गजमेरले लेखेका हुन् । फिल्म साइन गरेपछि उत्साहित हुँदै आकाशले दर्शकको लामो प्रतीक्षा यसपटक विशेष हुने दाबी गरेका छन् । फागुनको अन्तिम साताबाट छायांकन सुरु गरिने यस फिल्मका अन्य कलाकार र प्राविधिकहरूको विवरण भने निर्माण पक्षले क्रमशः सार्वजनिक गर्दै जाने बताएको छ ।
@parikalanewsofficial
Discussion about this post