इटहरी/ कपिलवस्तुको चन्द्रौटामा हिजो पौष २८ गते आयोजित एक सांगीतिक कार्यक्रममा ठूलो तनाव सिर्जना भएको छ । चर्चित र्यापर ‘जिबब’को प्रस्तुति हेर्न भेला भएका दर्शक साउन्ड सिस्टमको खराबीका कारण अनियन्त्रित बनेका हुन् । कार्यक्रममा युवापुस्ता माझ लोकप्रिय र्यापर जिबबलाई सुन्न र हेर्न ठूलो संख्यामा युवापुस्ताका दर्शकहरूको उपस्थिति थियो ।
निर्धारित समय अनुसार नै र्यापर जिबब स्टेजमा उक्लिएका थिए । दर्शकहरू आफ्नो मनपर्ने कलाकारलाई देखेर निकै उत्साहित थिए र हुटिङ गरिरहेका थिए । तर, जब जिबबले गाउन सुरु गरे, तब माइकमा बारम्बार समस्या देखिन थाल्यो ।
माइक बेला-बेला आफैं बन्द हुने र चल्ने समस्या आएपछि कलाकारले सहज रूपमा आफ्नो प्रस्तुति दिन सकेनन् । पटक-पटकको प्राविधिक गडबडीले माहोल तताउन खोजिरहेका र्यापर र रमाइरहेका दर्शक दुवैलाई निराश बनायो ।
सुरुमा प्राविधिक समस्या समाधान हुने आशामा बसेका दर्शकहरू लामो समयसम्म पनि साउन्ड सिस्टम नसुध्रिएपछि आक्रोशित बन्न पुगे । जिबबले पनि उपस्थित भीडलाई स्टेजबाट सम्झाउँदै थिए । तर, टिकट काटेर कार्यक्रम हेर्न आएका दर्शकहरूले आफूहरू ठगिएको महसुस गर्दै आयोजकविरुद्ध नाराबाजी सुरु गरे । केही समयमै आक्रोशित भीड अनियन्त्रित बन्यो ।
@parikalanewsofficial
भीडले आयोजक समिति र मञ्चलाई लक्षित गर्दै ढुङ्गामुढा प्रहार गर्न थाले । यति मात्र होइन, कन्सर्ट स्थलमा रहेका दर्जनौं प्लास्टिकका कुर्सीहरू तोडफोड गरिए भने साउन्ड सिस्टमका उपकरणहरूमा समेत क्षति पुर्याइएको छ । हजारौँको संख्यामा दर्शक उपस्थित हुने अनुमान गरिएको उक्त कार्यक्रममा सुरक्षा व्यवस्था भने निकै फितलो पाइएको प्रत्यक्षदर्शीहरूले बताएका छन् ।
भीड आक्रामक बन्दै जाँदा उनीहरूलाई नियन्त्रणमा लिन र स्थितिलाई सामान्य बनाउन आयोजक तथा उपस्थित सुरक्षाकर्मीलाई हम्मेहम्मे परेको थियो । पर्याप्त सुरक्षाकर्मीको अभावमा भीड अनियन्त्रित हुँदा तोडफोड रोक्न सकिएन । स्थिति तनावपूर्ण बन्दै गएपछि र सुरक्षाको जोखिम बढेपछि आयोजकले बाध्य भएर कार्यक्रम स्थगित गरेको घोषणा गरे । तोडफोडबाट भएको क्षतिको यकिन विवरण भने आउन बाँकी छ ।
Discussion about this post