इटहरी/ दिवङ्गत गायक तथा अभिनेता प्रशान्त तामाङको पार्थिव शरीर आज बिहान गृह नगर ल्याइएको छ । दिल्लीका विभिन्न पक्षहरूसँगको व्यापक समन्वय र जीटीए प्रमुख अनित थापाको विशेष पहलपछि उनको शव आज बिहान ९:३० बजे इन्डिगो एयरलाइन्सको विमान मार्फत बागडोगरा विमानस्थलमा अवतरण गराइएको हो ।
दिवङ्गत तामाङको पार्थिव शरीरलाई आज दार्जिलिङको चौरस्तामा सर्वसाधारण तथा शुभचिन्तकहरूको दर्शनका लागि राखिने भएको छ । त्यहाँ उनलाई अन्तिम श्रद्धाञ्जली अर्पण गर्ने कार्यक्रम तय गरिएको छ । शवलाई दिल्लीबाट सम्मानपूर्वक ल्याउनका लागि धेरै पक्षहरूले महत्त्वपूर्ण भूमिका खेलेका छन् ।
जीटीएका प्रमुख कार्यपाल अनित थापाले शव ल्याउन र आफन्तहरूको आउ-जाउको सम्पूर्ण टिकट खर्च बेहोरेका छन् । साथै, कार्यकारी निर्देशक साम्देन डुकपाले अन्तिम यात्राको खर्चका लागि तुरुन्तै आर्थिक सहयोग उपलब्ध गराएका थिए । दिल्लीमा नागा युवती एस्तर र ‘हेल्पिङ ह्यान्ड्स दिल्ली’ का नरेश कुमारले दिनभर अस्पतालमा खटेर टिकट र एम्बुलेन्सको व्यवस्थापनमा सहयोग पुर्याए ।
@parikalanewsofficial
बिदाको दिन भए तापनि सागरपुर पीएस इन्स्पेक्टर सञ्जीव कुमार, ज्वाइन्ट सीपी दीपक पुरोहित (आईपीएस), चन्दन देवी र डीडीयू अस्पतालका डाक्टरहरूले शवको पोस्टमार्टम कार्य सम्पन्न गर्न विशेष सहयोग गरे । शव बुझ्नका लागि जीटीएले सम्पर्क अधिकृत तथा सीए विभागका सहायक निर्देशक भानु कान्ता घिसिङलाई एम्बुलेन्ससहित बागडोगरा विमानस्थलमा खटाएको थियो । कलाकार र शुभचिन्तकहरूले पनि दिल्लीबाट शवलाई सम्मानपूर्वक ल्याउन सक्रिय भूमिका खेलेका थिए ।
Discussion about this post