इटहरी/ आमा नहुँदा घर कति सुनसान हुन्छ र जीवनसाथी बिनाको यात्रा कति कष्टकर हुन्छ ? यही प्रश्नको मर्मस्पर्शी जवाफ लिएर फिल्म ‘मिरमिरे’को ट्रेलर दर्शकमाझ आएको छ । निर्माण पक्षले मंगलबार काठमाण्डौमा एक विशेष कार्यक्रम आयोजना गर्दै फिल्मको प्रचारप्रसार औपचारिक रूपमा थालेको हो । सार्वजनिक ३ मिनेट लामो ट्रेलरले दर्शकलाई भावुक बनाउँछ ।
कथाको केन्द्रमा बुवा र छोरीबीचको गहिरो आत्मीयता छ । आमाको माया नपाएकी छोरी र उनलाई आमाको अभाव हुन नदिन संघर्षरत बाबुको भूमिकामा दयाहाङ राई देखिएका छन् । तर, कथा यतिमा मात्र सीमित छैन । ट्रेलरमा दयाहाङ राई, प्रकाश सपूत र सिर्जना निङलेखुबीचको त्रिकोणात्मक प्रेम सम्बन्धलाई पनि रोचक ढंगले प्रस्तुत गरिएको छ । एकले अर्कोलाई पाउने चाहना र त्यसभित्रका जटिलताहरू पर्दामा पोखिएका छन् । हेर्नुस् ट्रेलर ।
@parikalanewsofficial
विशेषगरी, जब सानी छोरी अर्थात् शाइसा गौचनले ‘नुमा’ आफ्नी वास्तविक आमा होइनन् भन्ने थाहा पाउँछिन्, त्यसपछिको उनको प्रतिक्रिया र आफ्नी आमा खोज्न गरेको संघर्षले दर्शकको मन छुन्छ । यम शेर्पाको लेखन तथा निर्देशन रहेको यो फिल्म आगामी माघ १ गते अर्थात मकर संक्रान्ति देखि देशभर प्रदर्शनमा आउँदैछ ।
@parikalanewsofficial
यार्सा फिल्मसको ब्यानरमा बनेको फिल्ममा दयाहाङ, प्रकाश र सिर्जनाका साथमा माओत्से गुरुङ, छुल्ठिम गुरुङ, भोलाराज सापकोटा, विमल यादव, दिविशा पन्त, चिराग श्रेष्ठ, नमनराज गजुरेल लगायतका कलाकारहरूको अभिनय छ । निमु शेर्पा, छोङ्बा लामा शेर्पा र आङछिरिङ शेर्पा निर्माता रहेको यस फिल्मका कार्यकारी निर्माता रोहित कट्टेल हुन् भने सह-निर्मातामा गोविन्द बोहरा र सुदिप कुँवर छन् । फिल्ममा सुदीप कुँवर मुख्य सहायक निर्देशक, वीरेन्द्र शाही लाइन प्रोड्युसर, सञ्जु थलाङ लिम्बु मेकअप र दिलीप पन्त निर्माण नियन्त्रक रहेका छन् । फिल्मको वितरणको जिम्मा आरआर फिल्म्सले लिएको छ ।
Discussion about this post