इटहरी/ भनिन्छ, ‘समयले ठूला–ठूला घाउ पुर्छ ।’ नेपाली फिल्म क्षेत्रको चर्चित जोडी दीपकराज गिरी र जितु नेपाल (मुन्द्रे) को सम्बन्धमा पनि यो भनाइ चरितार्थ भएको छ । ‘महानायक विवाद’ र ‘मुन्द्रेको कमेडी क्लब’ को खटपटपछि अलग भएका यी दुई पुराना मित्र करिब ७ वर्षपछि पुनः एकै फ्रेममा देखिने पक्का भएको छ ।
२०८१ को दशैँपछि फिल्म निर्माणबाट विश्राम लिएको ‘छक्का पञ्जा’ टिमले आफ्नो मौनता तोड्दै बहुप्रतिक्षित सिक्वेल ‘छ माया छपक्कै २’ निर्माणको घोषणा गरेको हो । र, यो घोषणासँगै सबैभन्दा ठूलो खबर बनेको छ-जितु नेपालको टिममा कमब्याक । ‘छक्का पञ्जा’ टिमबाट बाहिरिएपछि जितुले बाहिरी ब्यानरका फिल्ममा काम गरिरहेका थिए ।
दीपक–दीपासँग जितुले गरेको अन्तिम सहकार्य ‘छ माया छपक्कै’ नै थियो । अब यसको दोस्रो भाग मार्फत नै उनी पुरानो घर फर्किँदैछन् । यसको पुल बनेका छन् निर्माता रोहित अधिकारी । यद्यपि, स्रोतका अनुसार फिल्ममा जितुको उपस्थिति भने ‘अतिथीय’ भूमिकामा मात्र हुनेछ । उनी पहिलेको जस्तो फिल्मभरि देखिने छैनन्, तर कथामा उनको भूमिका महत्त्वपूर्ण हुने बताइएको छ । निर्माता रोहित अधिकारीका अनुसार यो फिल्मको प्रदर्शन मिति निकै रणनीतिक रूपमा तय गरिएको छ ।
@parikalanewsofficial
टिमले २०८३ सालको दशैँलाई आफ्नो प्रदर्शन मिति तोकेको छ भने छायाङ्कन आउँदो चैत १ गतेबाट सुरु हुनेछ । फिल्मको लेखन कार्यमा अहिले निर्देशक दीपेन्द्र लामा र दीपकराज गिरी सक्रिय रूपमा लागिपरेका छन् । फिल्ममा दीपकराज गिरी, केदार घिमिरे ‘माग्ने बूढा’ र नायिका केकी अधिकारी मुख्य भूमिकामा दोहोरिनेछन् । तितो विगतलाई बिर्सेर दीपक र जितुको यो सहकार्यले नेपाली फिल्म बजारमा नयाँ तरंग ल्याउने निश्चित छ ।
Discussion about this post