फिल्म ‘बिगुल’को प्रचार कोशी प्रदेशको इटहरीबाट सुरू, इटहरी जेसिजको साथ

इटहरी/ राजनीतिक बेथिति र नेतृत्वको लडाइँको कथा बोकेको प्रतिक्षित नेपाली फिल्म ‘बिगुल’ले कोशी प्रदेशबाट आफ्नो देशव्यापी प्रचारप्रसार अभियानको शंखघोष गरेको छ । आगामी माघ ९ गतेबाट प्रदर्शनको तयारीमा रहेको यो फिल्मको टोली यतिबेला कोशी प्रदेशको ‘हब’ इटहरी आइपुगेको छ । मंगलबार बिहान इटहरीस्थित जेसिस भवनमा आयोजित एक कार्यक्रमका बीच फिल्मको प्रचार अभियान शुभारम्भ गरियो ।

इटहरी जेसिजको आयोजना तथा व्यवस्थापनमा भएको उक्त कार्यक्रममा जेसिज र जुनियर जेसिजका युवाहरूको उपस्थिति रहेको थियो । कोशी प्रदेशमा करिब ३ देखि ४ दिनसम्म बसेर आक्रामक प्रचारप्रसार गर्ने योजनासहित फिल्मका लेखक तथा निर्माता दिनेश कोइराला र निर्देशक रमेश कोइरालाको टोली पूर्व आइपुगेको हो । पछिल्लो समय देशमा देखिएको युवा वितृष्णा र आन्दोलनको झझल्को दिने फिल्मको कथाबारे निर्माता दिनेश कोइरालाले प्रष्ट्याएका छन् ।

टिजर तथा ट्रेलर सार्वजनिक भएपछि धेरैले यसलाई हालैको ‘जेनजी’ आन्दोलनबाट प्रभावित ठाने पनि निर्माता कोइरालाले यो केवल एक संयोग मात्र भएको बताए ।
कार्यक्रममा बोल्दै उनले भने, “फिल्मको छायांकन गत बैशाखबाटै सुरु गरिएको हो, त्यसैले यो आन्दोलनपछि कोरिएको कथा होइन । तर, फिल्मले उठाएको मुद्दा र अहिलेको सडकको आवाज मेल खानु भने संयोग हो । ‘बिगुल’ मनोरञ्जन मात्र नभई सामाजिक चेतना र सही नेतृत्व चयनका लागि एक झक्झक्याउने माध्यम बन्नेछ ।”

@parikalanewsofficial

गत आइतबार सार्वजनिक ३ मिनेट लामो ट्रेलरले दर्शकमाझ गम्भीर प्रश्न छोडेको छ । ट्रेलरमा सत्ताको लुछाचुँडी, पुराना नेताको कुर्सी मोह र पटक-पटक धोका पाएका युवा पुस्ताको आक्रोशलाई देखाइएको छ । परिवारभित्रको द्वन्द्व र निमुखा जनतामाथिको राजनीतिक खेलबाडलाई मुख्य विषय बनाइएको यो फिल्मले आसन्न निर्वाचनको परिवेशलाई समेट्दै “अब कस्तो नेतृत्व चुन्ने ?” भन्ने बहस सिर्जना गरेको छ । फिल्मको अर्को रोचक पक्ष यसको संगीत हो । फिल्मका गीतहरूमा नेपाली कांग्रेसका महामन्त्री विश्वप्रकाश शर्मा, अर्जुन पोखरेल र मनोज चौलागाईंको संगीत रहेको छ ।

दिनेश कोइरालाको कथा र निर्माणमा बनेको फिल्मलाई रमेश कोइरालाले निर्देशन गरेका हुन् । फिल्ममा युवा पुस्ताको प्रतिनिधित्व गर्दै बेनीशा हमाल, नरेन खड्का र विनोद न्यौपानेले अभिनय गरेका छन् भने दिग्गज कलाकारहरू सरोज खनाल, रमेश बुढाथोकी, नीर शाह र हेमन्त बुढाथोकीको अभिनयले फिल्मलाई ओजिलो बनाएको छ ।
शिव ढकालको छायांकन र तारा थापा ‘किम्भे’ को सम्पादन रहेको फिल्मको पटकथा प्रदिप भारद्वाज र मौनता श्रेष्ठले तयार पारेका हुन् । फिल्ममा मिरा पण्डितले डेब्यु गरेकी छन् भने रविन्द्र खड्का विशेष भूमिकामा देखिनेछन् ।