फिल्म ‘किन लाग्छ माया’ को ‘धौले धन्सार’ गीत सार्वजनिक

इटहरी/ दाजुभाइको भावनात्मक कथा बोकेको आगामी फिल्म ‘किन लाग्छ माया’ ले आफ्नो प्रचारप्रसारलाई सांगीतिक कोसेली मार्फत सुरुवात गरेको छ । सन् २०२६ मा प्रदर्शनको लक्ष्य राखिएको यस फिल्मको निर्माण पक्षले, पोष्टर सार्वजनिक गरे पश्चात पहिलो गीत ‘धौले धन्सार’ बजारमा ल्याएको हो । सार्वजनिक गीत विशुद्ध लोक शैलीमा तयार पारिएको छ ।

डाक्टर अशाबहादुर तामाङको शब्द सिर्जना र पुष्कर सुनुवारको संगीत रहेको यस गीतमा तीन चर्चित गायक गायिकाको जादुमय स्वर सुन्न सकिन्छ । पुष्कर सुनुवार, शान्तीश्री परियार र हास्य कलाकार समेत रहेका गोपाल ढकाल ‘छन्दे’ को स्वरले गीतलाई निकै कर्णप्रिय बनाएको छ । गीतको अडियो जति सुमधुर छ, भिडियो पनि उत्तिकै आकर्षक बनेको छ । हेर्नुस् भिडियो ।

रामजी लामिछानेको कोरियोग्राफी रहेको भिडियोमा फिल्मका मुख्य कलाकारहरूको लामै लस्कर देख्न सकिन्छ । नायक सञ्जित भण्डारी, जाहान्वी बस्नेत, ऋचा थापा र हिउवाला गौतमका साथमा अहिलेकी चर्चित मोडल ‘मिस पबी’ ले कम्मर मर्काएकी छिन् । साथै, यसै फिल्मबाट डेब्यु गरिरहेका नव–नायक स्याडो रियल, उत्तम केसी र सेजल सुवेदीको नृत्यले भिडियोलाई थप रमाइलो बनाएको छ ।

कुबेर तामाङको निर्देशनमा बनेको यो फिल्ममा कलाकारहरूको ठूलो टिम छ । राजेन्द्र खड्गी, रवि डंगोल, गोपाल ढकाल, सम्रान्त थापा लगायतका अनुभवी कलाकारहरूले यसमा अभिनय गरेका छन् । आरआर फिल्मस्ले वितरण गर्ने जिम्मा लिएको यो फिल्ममा सञ्जित भण्डारी र मोनु खड्काको लगानी रहेको छ ।

@parikalanewsofficial

फिल्मको प्राविधिक पक्ष पनि बलियो देखिन्छ । राजेन्द्र खड्गीको एक्सन, रामशरण उप्रेती र रामकुमार केसीको छायांकन तथा बनिष शाह र नविन चौधरीको सम्पादनले फिल्मलाई अब्बल बनाउने अपेक्षा गरिएको छ । फिल्मको कथा र शब्द नव–नायक स्याडो रियलले नै लेखेका हुन् भने पटकथा र संवाद रामकाजी घिमिरेको रहेको छ । दाजुभाइको कथामा आधारित ‘किन लाग्छ माया’ ले दर्शकको मन जित्नेमा निर्माण टिम पूर्ण विश्वस्त देखिएको छ ।