वेब सिरिज ‘सत्य सावित्री जब सेन्टर’का लागि कलाकारको खोजी

इटहरी/ “कोही नायक छैन, कोही खलनायक छैन-मात्र सत्य छ ।” यही नाराका साथ फिल्म अस्त्र प्रोडक्सनले नेपाली समाजको एउटा यस्तो पाटोलाई वेब सिरिज ‘सत्य सावित्री जब सेन्टर’ मार्फत सार्वजनिक गर्ने तयारी गरेको छ, जसले वैदेशिक रोजगारीको कहालीलाग्दो चित्र प्रस्तुत गर्छ । निर्माण पक्षले आज सोमबार एक पोस्टर सार्वजनिक गर्दै अभिनयमा रुचि भएका नयाँ तथा थिएटर कलाकारहरूका लागि ‘कास्टिङ कल’ आह्वान गरेको छ ।

यस शृङ्खलाले विशेष गरी पूर्वी नेपालबाट वैदेशिक रोजगारीमा जाने युवाहरूको कथा, उनीहरूको बाध्यता र अँध्यारो यथार्थलाई समेट्नेछ । यस सिरिजको हिस्सा बन्न चाहने वा आफ्ना वास्तविक कथाहरू साझा गर्न चाहनेहरूका लागि निर्माण टीमले सम्पर्क आह्वान गरेको छ । टिमले ५ पुरुष कलाकार र ४ महिला कलाकारको खोजी गरेको छ । पुरुष कलाकार १८ देखि ५० वर्ष उमेर समूहको हुनुपर्नेछ भने महिला कलाकार १८ देखि ४० वर्ष उमेर समूहको हुनुपर्ने बताइएको छ ।

इच्छुकले ९८६३४३८९९३ र ९८२५३४९६३३ मा ह्वाट्सएप म्यासेज गरेर आवेदन दिन सकिनेछ भने आवेदन दिने अन्तिम मिति यही २३ गते सम्म रहेको छ । सार्वजनीक पोस्टरमा प्रयोग गरिएको विमानको तस्विर र “यहाँ २५० मा देश छोडिन्छ” भन्ने वाक्यांशले वैदेशिक रोजगारीको पीडा र यससँग जोडिएका सामाजिक चुनौतीहरूलाई सिरिजले मुख्य विषयवस्तु बनाएको प्रष्ट हुन्छ ।

यसले पासपोर्ट साइजको फोटो खिच्ने सानो खर्चदेखि लिएर देश छोड्नुपर्ने अन्तिम विन्दुसम्मको सस्तो मानिएको मानवीय मूल्यलाई व्यङ्ग्य गरेको छ । सत्य साबित्री जब सेन्टर जस्ता वैदेशिक रोजगारका माध्यमहरू मार्फत जोडिएका हजारौँ युवाका सपना र तिनले भोग्ने यथार्थलाई यस सिरिजले नजिकबाट नियाल्नेछ । यसका प्रमुख पात्रले भने विदेश नगई नेपालमै केही गर्छु भन्ने सोच बोकेको हुन्छ ।

@parikalanewsofficial

फिल्म अस्त्र प्रोडक्सनले यस प्रोजेक्टका लागि व्यावसायिक कलाकारभन्दा पनि ‘वास्तविक अनुहार’ हरूलाई प्राथमिकता दिने भएको छ । निर्माण टिमका अनुसार यो कुनै स्क्रिप्टेड ड्रामा मात्र नभई, समाजको वास्तविक ऐना हो । निर्माण पक्षको भनाइ छ “हामीलाई हिरो चाहिएको छैन, न त भिलेन नै । हामीलाई केवल त्यो सत्य चाहिएको छ जुन धेरैले बोल्न डराइरहेका छन् । अन्धकारबाट यथार्थसम्मको यात्रा नै हाम्रो मूल उद्देश्य हो ।”