राजनीतिको ‘फोहोरी खेल’ विरुद्ध ‘बिगुल’ फुक्दै बेनीशा र नरेन: सार्वजनिक भयो ट्रेलर

इटहरी/ आगामी माघ ९ गतेबाट देशभर प्रदर्शनको तयारीमा रहेको नेपाली फिल्म ‘बिगुल’को अफिसियल ट्रेलर सार्वजनिक गरिएको छ । आइतबार सार्वजनिक झन्डै तीन मिनेट लामो ट्रेलरले समाजमा व्याप्त राजनीतिक बेथिति र नागरिकको छटपटीलाई नजिकबाट नियाल्ने प्रयास गरेको छ । ट्रेलरले सत्ताको लुछाचुँडी, नेतृत्वको गैरजिम्मेवारीपन र त्यसको मारमा परेका आम सर्वसाधारणको कथालाई समेटेको छ ।

पटक–पटक धोका पाएका युवा पुस्ता र कुर्सी मोह नछाड्ने पुराना नेताहरूबीचको वैचारिक टकराव ट्रेलरमा देखिन्छ भने परिवारभित्रको द्वन्द्व र निमुखा जनतामाथि भइरहेको राजनीतिक खेलबाडलाई मुख्य कथा बनाइएको छ । आसन्न निर्वाचनको पृष्ठभूमिमा तयार पारिएको यो फिल्मले “कस्तो नेतृत्व चुन्ने ?” भन्ने गम्भीर प्रश्न दर्शकमाझ छाडेको छ । हेर्नुस् ट्रेलर ।

निर्देशक रमेश कोइरालाको निर्देशनमा तयार भएको यस फिल्ममा कलाकारहरूको बलियो उपस्थिति देखिएको छ । बेनीशा हमाल, नरेन खड्का र विनोद न्यौपानेले युवा आक्रोशलाई जीवन्त रूपमा प्रस्तुत गरेका छन् । यस्तै सरोज खनाल, रमेश बुढाथोकी, नीर शाह, हेमन्त बुढाथोकी जस्ता दिग्गज कलाकारहरूको साथले फिल्मलाई थप ओजिलो बनाएको छ । रविन्द्र खड्का विशेष भूमिकामा छन् भने मिरा पण्डितले यसै फिल्मबाट डेब्यु गरेकी छन् ।

@parikalanewsofficial

दिनेश कोइरालाको कथा र निर्माणमा बनेको ‘बिगुल’ मा प्राविधिक पक्ष पनि उत्तिकै सबल देखिन्छ । रोचक कुरा त के छ भने, यसका गीतहरूमा नेपाली कांग्रेसका महामन्त्री विश्वप्रकाश शर्मा, अर्जुन पोखरेल र मनोज चौलागाईंको संगीत रहेको छ । शिव ढकालको छायांकन र तारा थापा ‘किम्भे’ को सम्पादन रहेको फिल्मको पटकथा प्रदिप भारद्वाज र मौनता श्रेष्ठले लेखेका हुन् । “यो फिल्म मनोरञ्जनका लागि मात्र नभई सामाजिक चेतना र सही नेतृत्व चयनका लागि एक झक्झक्याउने माध्यम बन्नेछ,” निर्देशक कोइराला भन्छन् ।