हिन्दी गीतको भिडियोमा गरिमा शर्मा र रोशन अधिकारीको जम्यो केमेस्ट्री

इटहरी/ नेपाली मोडलिङ क्षेत्रकी चर्चित अभिनेत्री तथा मोडल गरिमा शर्मा हिन्दी म्युजिक भिडियोमा देखिएकी छन् । हालै सार्वजनिक भएको एक ठूलो बजेटको रानी बोलको हिन्दी गीतमा गरिमाले मोडल तथा गायक रोशन अधिकारीसँग स्क्रिन शेयर गरेकी हुन् । शनिबार सार्वजनिक गरिएको भिडियोको निर्माण पक्षले यसको लागतलाई लिएर सबैको ध्यान खिचेको छ ।

अमेरिकाका विभिन्न मनमोहक लोकेसनमा छायांकन गरिएको यस भिडियोको कुल लागत ५५ हजार अमेरिकी डलर अर्थात् झण्डै ७५ लाख नेपाली रुपैयाँ रहेको दाबी गरिएको छ । गायक तथा मोडल अधिकारीका अनुसार, गीतको गुणस्तर र नेपाल-अमेरिका आउजाउका कारण लगानी केही महँगो हुन पुगेको हो । सार्वजनीक गीतको भिडियोमा दुई युवा युवतीबीचको सुन्दर र भावनात्मक प्रेम कहानीलाई देखाइएको छ । हेर्नुस् भिडियो ।

भिडियोलाई पूर्ण रूपमा अमेरिकामा छायांकन गरिएको हो । सिद्धार्थ विश्वको निर्देशन र शान थापाको अवधारणामा तयार भएको यस भिडियोलाई अमृत विश्वले छायांकन गरेका हुन् । सुमन लामिछानेको कोरियोग्राफी, विवेक सुनारको सम्पादन र मिलन विश्वकर्माको कलरिङ रहेको छ । “नेपालबाट म्युजिक भिडियोकै लागि अमेरिका पुग्दाको अनुभव निकै भिन्न र सुखद रह्यो । एउटा राम्रो टिमसँग काम गर्दा उत्कृष्ट नतिजा निस्किएको छ,” अभिनेत्री गरिमा शर्माले आफ्नो अनुभव सुनाईन् ।

@parikalanewsofficial

यस गीतमा रोशन अधिकारी केवल मोडलको रूपमा मात्र नभई गायक, गीतकार र संगीतकारको भूमिकामा समेत देखिएका छन् । अमेरिकामा बसोबास गर्दै आएका अधिकारीले नेपाली मनोरञ्जन क्षेत्र आफ्नो जीवनको अभिन्न अंग भएको र आगामी दिनमा पनि यसलाई निरन्तरता दिने प्रतिबद्धता जनाएका छन् । दृश्य र शब्दको सन्तुलन मिलेको यो भिडियोले प्रेमीले प्रेमिकाप्रति दर्शाउने साँचो प्रेम भावलाई कलात्मक ढङ्गले प्रस्तुत गरेको छ ।