प्रदीप खड्का भन्छन्, ‘सन्तोष सेनसँग कुरा भयो, अर्को फिल्म गर्ने सल्लाह हुँदैछ’

इटहरी/ नेपाली फिल्म क्षेत्रका चल्तिका अभिनेता प्रदीप खड्का र निर्माता तथा निर्देशक सन्तोष सेनबीचको सम्बन्धलाई लिएर लामो समयदेखि चल्दै आएको अड्कलबाजी अन्ततः सकारात्मक मोडमा पुगेको देखिन्छ । फिल्म ‘प्रेमगीत ३’ को प्रदर्शनपछि यी दुईबीच बोलचाल नै बन्द भएको र सम्बन्धमा चिसोपना आएको चर्चा फिल्मी वृत्तमा व्यापक थियो ।

तर, हालै अभिनेता खड्काले दिएको एक अभिव्यक्तिले यो जोडी पुनः पर्दामा फर्किने बलियो संकेत दिएको छ । लोकप्रिय कार्यक्रम ‘कठघरा’मा कुराकानी गर्दै अभिनेता प्रदीप खड्काले आफू र सन्तोष सेनबीचको सम्बन्ध राम्रो रहेको बताएका छन् । विगतको मनमुटाव र बोलचाल बन्द भएको हल्लालाई चिर्दै उनले भने, “लगभग एक हप्ता अगाडि जस्तो फोनमा कुरा भएको छ । अब अर्को फिल्म गर्ने भन्ने सल्लाह भइरहेको छ ।”

प्रदीपको यो भनाइले ‘प्रेमगीत’ सिरिजका फ्यानहरूमा उत्साह जगाएको छ । ‘प्रेमगीत’, ‘प्रेमगीत २’ र ‘प्रेमगीत ३’ जस्ता ब्लकबस्टर फिल्म दिएका यी दुईको टिमलाई नेपाली बजारमा निकै सफल मानिन्छ । फिल्म पण्डितहरूका अनुसार, प्रदीप र सन्तोषको यो मिल्ती समयको माग पनि हो ।

@parikalanewsofficial

पछिल्लो समय यी दुवैको फिल्मी करियरले सोचेजस्तो गति लिन सकेको छैन । सन्तोष सेनको ड्रिम प्रोजेक्ट भनिएको र ठुलो हाइपका साथ प्रदर्शनमा आएको फिल्म ‘बलिदान’ ले बक्स अफिसमा निकै निराशाजनक व्यापार गर्यो । महँगो बजेटमा बनेको यो फिल्मले लगानी उठाउन समेत मुस्किल परेपछि सेन दबाबमा देखिएका थिए ।

अर्कोतर्फ, हाल प्रदर्शन भइरहेको प्रदीप खड्काको महत्वाकांक्षी फिल्म ‘एक्लो १’ को हविगत पनि उस्तै देखिएको छ । साइन्स-फिक्सन जनरामा बनेको दाबी गरिएको यस फिल्मलाई दर्शक र समीक्षक दुवैले रुचाएनन्, जसका कारण फिल्मको व्यापार सन्तोषजनक हुन सकिरहेको छैन ।

आफ्ना पछिल्ला फिल्महरू लगातार फ्लप भएपछि प्रदीप र सन्तोष दुवैलाई एउटा दरिलो ‘कमब्याक’ को आवश्यकता छ । सामाजिक सञ्जाल र मिडियामा चलेका ‘इगो’ का कुराहरूलाई थाती राख्दै व्यावसायिक सफलताका लागि यो जोडी पुनः एकै ठाउँमा आउनु नेपाली फिल्म क्षेत्रका लागि सुखद समाचार हुनसक्छ ।