‘मन बिनाको धन’को सफलतापछि टंकको नयाँ फिल्म: पर्दामा फर्किदै अशोक र एआर

इटहरी/ नेपाली सङ्गीत आकाशमा आफ्नो छुट्टै पहिचान बनाएका गायक तथा संगीतकार टंक बुढाथोकी अब पुनः नेपाली फिल्म क्षेत्रमा जम्ने तयारीमा जुटेका छन् । पहिलो फिल्म ‘मन बिनाको धन’ मार्फत बक्स अफिसमा झन्डै ४ करोडको व्यापार गर्दै सुखद डेब्यु गरेका बुढाथोकीले आफ्नो दोस्रो फिल्म ‘बा–आमा’ निर्माण गर्ने घोषणा गरेका हुन् ।

टंक बुढाथोकीले पछिल्लो समय आफ्ना चर्चित गीतहरूलाई फिल्मको स्वरूप दिने शैली अपनाएका छन् । करिब ५ वर्षअघि चर्चाको शिखरमा रहेको उनकै गीत ‘बा–आमा’ को थिममा आधारित भएर यो नयाँ फिल्म बन्न लागेको हो । यो फिल्मले नेपाली समाजको पारिवारिक सम्बन्ध र संवेदनालाई पर्दामा उतार्ने लक्ष्य राखेको छ ।

@parikalanewsofficial

यस फिल्मको मुख्य आकर्षणको रूपमा चर्चित बालगायक अशोक दर्जी र टंककै छोरा एआर बुढाथोकी रहनेछन् । यी दुई बाल प्रतिभाको जोडीलाई दर्शकले पुनः एकसाथ पर्दामा देख्न पाउनेछन् । फिल्मका अन्य कलाकारहरू भने ‘अडिसन’ र छनोट प्रक्रिया मार्फत तय गरिने निर्माण पक्षले जनाएको छ । टंक बुढाथोकीको मौलिक कथालाई शिवम् अधिकारीले पटकथा र संवादमा ढालिरहेका छन् ।

चलचित्र विकास बोर्डमा शीर्षक दर्ता भइसकेको छ भने स्क्रिप्टको काम अन्तिम चरणमा पुगेको टंक बताउँछन् । सबै प्राविधिक तयारी पूरा गरी आगामी वैशाखदेखि सुटिङ सुरु गर्ने योजना छ । टंक बुढाथोकी प्रोडक्सनको प्रस्तुति रहने यस फिल्मलाई विष्णुमाया मैनालीले लगानी गर्दैछिन् । “अघिल्लो फिल्ममा देखिएका सानातिना कमजोरीहरूलाई सुधार्दै यसपटक अझ परिपक्व र हृदयस्पर्शी कथा पस्कने प्रयासमा छौँ,” बुढाथोकीले आफ्नो योजना सुनाए ।