फिल्म ‘कुमारी’को ‘डोको बुन्ने’ गीतमा झल्कियो मौलिक प्रेम

इटहरी/ प्रेम कथानक फिल्म निर्देशनमा आफूलाई अब्बल सावित गरिसकेका निर्देशक दिनेश राउत फेरि एकपटक दर्शकलाई प्रेमको गहिराइमा डुबाउन तयार भएका छन् । ‘प्रसाद’ र ‘पुजार सार्की’ जस्ता गम्भीर सामाजिक विषयका फिल्मपछि राउतले आफ्नै ‘सिग्नेचर स्टाइल’मा फर्किएर निर्माण गरेको फिल्म ‘कुमारी’को लोक-पप शैलीको नयाँ गीत ‘डोको बुन्ने’ सार्वजनिक गरिएको छ ।

काठमाडौको वान सिनेमाजमा आयोजित कार्यक्रममा सार्वजनिक गरिएको यो गीतले नेपाली समाजको मौलिक प्रेमकथालाई पुरानै शैलीमा प्रस्तुत गरेको छ । यो फिल्ममार्फत नेपाली फिल्म क्षेत्रले दुई नयाँ प्रतिभा अबिषेक खड्का र आकृति राजभण्डारीलाई मुख्य भूमिकामा पाएको छ । सार्वजनिक गीतको भिडियोमा यी दुईको केमेस्ट्री निकै सुहाउँदो देखिएको छ । अभिनेत्री आकृतिले राम्रो टिम र स्क्रिप्टकै कारण आफूले ‘कुमारी’ बाट डेब्यु गर्ने निर्णय लिएको बताइन् ।

यस्तै अभिनेता अबिषेकले आफ्नो बाल्यकालदेखिको अभिनयको सपना यस फिल्ममार्फत पूरा भएकोमा उत्साह व्यक्त गरे । यता निर्देशक दिनेश राउत भन्छन्, “मैले ‘आई एम सरी’ देखि ‘क्लासिक’ सम्म धेरै प्रेमकथाहरू बनाएँ । बीचमा सामाजिक विषयमा काम गरे पनि मेरो मन भने प्रेमकथामै बढी रमाउँछ । ‘कुमारी’ मेरो त्यही प्रिय विधाको उत्कृष्ट पुनरागमन हो ।” हेर्नुस् भिडियो ।

यो फिल्मको गीतहरूमा केहर सिं लिम्बु र सुमन तामाङको सुमधुर स्वर र संगीत सुन्न सकिन्छ भने शब्द सागर लामिछाने मगर र सुमन तामाङको रहेको छ । फिल्ममा नृत्य निर्देशकको रुपमा शिशिर खातीले कलात्मक ढंगले कलाकारलाई नचाएका छन् । गीतमा रिकेश गुरुङको उत्कृष्ट साउन्ड डिजाइन रहेको छ ।

@parikalanewsofficial

लेखक विकास सुवेदीको कथा रहेको यस फिल्मलाई महेन्द्र अधिकारीले निर्माण गरेका हुन् भने कार्यकारी निर्माताको जिम्मेवारी केदार भुसालले सम्हालेका छन् । माघ २३ गते प्रदर्शन हुन लागेको यो फिल्मले विशेषगरी ‘भ्यालेन्टाइन डे’ अर्थात् प्रणय दिवसको छेको पारेर दर्शकलाई फिल्म हलसम्म तान्ने लक्ष्य राखेको छ । सुसन प्रजापतिको छायांकन, सुप्रीम पराजुलीको सम्पादन रहेको फिल्मलाई डिसीएनमेल काठमाण्डौ र कुवेर सिने डिस्ट्रीब्युशनले काठमाण्डौ बाहिर वितरणको जिम्मा पाएको छ ।