इटहरी/ पछिल्लो समय नेपाली समाजमा बढ्दै गएको ‘भाइरल’ हुने मोह र सामाजिक सञ्जालको प्रभावलाई मुख्य विषयवस्तु बनाएर निर्माण गरिएको फिल्म ‘भाइरल गोर्खे’को ट्रेलर सार्वजनिक गरिएको छ । आगामी माघ १ गते अर्थात माघे संक्रान्तिबाट देशभर प्रदर्शनमा आउने तयारीमा रहेको यो फिल्मको ३ मिनेट ५५ सेकेन्ड लामो ट्रेलरले दर्शकमाझ कौतुहलता जगाएको छ ।
बुधबार राजधानीमा आयोजित एक विशेष कार्यक्रमका बीच सार्वजनिक गरिएको ट्रेलरले फिल्मको मूल मर्मलाई प्रष्ट पारेको छ । फिल्मका मुख्य पात्र सौगात मल्ल (गोर्खे) एक्सन स्टार शिव श्रेष्ठ जस्तै चर्चित बन्ने सपना देख्छन् । भाइरल हुनका लागि टिकटकमा अनौठा र जोखिमपूर्ण हर्कत गर्ने उनको बानीले उनलाई सञ्जालमा त चर्चित बनाउँछ, तर वास्तविक जीवनका भोगाइ र चुनौतीहरू भने निकै फरक हुन्छन् । हेर्नुस् ट्रेलर ।
ट्रेलरमा सौगात र अभिनेत्री सृष्टि श्रेष्ठको जोडीलाई रोचक ढंगले प्रस्तुत गरिएको छ । निर्देशक निगम श्रेष्ठले यसपटक समाजको समसामयिक विषयलाई पर्दामा उतारेका छन् । ‘छड्के’ र ‘लालपूर्जा’ जस्ता फिल्म निर्देशन गरिसकेका श्रेष्ठ भन्छन्, “यो घरघरको कथा हो । रिल लाइफ र रियल लाइफ बीचको अन्तरविरोधलाई हामीले फिल्ममा प्रस्तुत गरेका छौँ । दर्शकले यसमा आफ्नै समाजको प्रतिविम्ब पाउनुहुनेछ ।”
फिल्ममा सौगात र सृष्टिका साथै चर्चित कलाकारहरूको जम्बो टोली देख्न सकिन्छ । बुद्धि तामाङ, लक्ष्मी गिरी, राजाराम पौडेल, ऋषि धमला, रवि भुजेल र ‘मिस पवी’को यो फिल्ममा प्रमुख अभिनय रहेको छ ।
@parikalanewsofficial
फिल्मलाई अमर महर्जनले लमजुङको भुजुङ गाउँ, गोरखा र चितवनका आकर्षक स्थानमा खिचेका हुन । एके ब्रदर कम्पनी, द जिएमआई एकेडेमी र निर्भाना फिल्म स्कुलले निर्माण गरेको फिल्मका निर्माताहरू: अमित श्रेष्ठ, विशाल ताम्राकार, महेश लामिछाने र केवल जंग कुँवर रहेका छन् । सामाजिक सञ्जालको होडबाजीले मानिसको निजी जीवनमा कस्तो प्रभाव पार्छ भन्ने गम्भीर प्रश्न उठाउँदै फिल्मले मनोरञ्जन र सन्देश दुवै दिने अपेक्षा गरिएको छ ।
Discussion about this post