इटहरी/ डान्सिङ फ्लोरमा जादु छर्ने र सगरमाथाको चुचुरोमा पाइला टेक्ने कविता नेपाली अब नेपाली फिल्म जगतमा तहल्का मच्चाउन तयार भएकी छन् । ‘बुगीवुगी’को विजेता बनेर चर्चाको शिखरमा पुगेकी कविता अब ‘अभिनेत्री’को नयाँ अवतारमा दर्शकमाझ आउँदैछिन् । नेपालकै पहिलो ‘साइन्स फिक्सन’ फिल्म भनिएको ‘एक्लो’ मार्फत कविताले नेपाली फिल्म क्षेत्रमा डेब्यु गर्दैछिन् ।
यही शुक्रबार अर्थात् पौष १७ गतेबाट प्रदर्शनमा आउन लागेको यस फिल्ममा उनले ‘एरियल’ नामक शक्तिशाली कमान्डोको भूमिका निभाएकी छन् । “म त एक्सिडेन्टल एक्टर हुँ, तर अब अभिनेत्रीकै पहिचानलाई अघि बढाउन चाहन्छु,” कविता भन्छिन् । रोचक कुरा के छ भने, निर्देशक प्रदीप शाहीसँग सुरुमा कविताको एउटा सानो एक्सन दृश्यका लागि मात्र कुरा भएको थियो । तर जब कविताले आफ्नो अडिसन क्लिप पठाइन्, उनको अभिनय र एक्सन देखेपछि निर्देशक यति प्रभावित भए कि उनलाई फिल्मकै मुख्य भूमिका सुम्पिए ।
फिल्मको छायांकनका अनुभव सुनाउँदै कविताले भनिन्, “मुस्ताङको ५००० मिटरभन्दा माथिको उचाइमा, रातभर लेक लाग्ने मौसममा एक्सन सिन खिच्नु निकै चुनौतीपूर्ण थियो । तर मेरो खेलाडी ब्याकग्राउन्डले गर्दा त्यो कठिन परिस्थिति पनि सहज भयो ।” फिल्मको मेकिङ र प्राविधिक पक्षलाई लिएर उनी निकै ढुक्क छिन्, तर पहिलो फिल्म भएकाले मनमा अलिकति डर पनि छ । “पहिलो फिल्म फ्लप भयो भने करिअर सकिन्छ भन्ने सुन्दा डर लाग्ने रहेछ,” उनले भनिन्, “तर स्क्रिप्ट अनुसार नै फिल्म बनेकाले दर्शकले नयाँ स्वाद पाउनुहुनेछ ।”
@parikalanewsofficial
प्रदीप शाहीको लेखन तथा निर्देशनमा बनेको फिल्म ‘एक्लो-१’ मा कविता सहित प्रदीप खड्का, विजय लामा, सुनील थापा, दिया पुन, वेनिशा हमाल, दिनेश डीसी, सुरजसिंह ठकुरी, एवन राज उप्रेती, त्रिचु राई, कृष्णभक्त महर्जन, विकास अधिकारी, दिग्गज खत्री, विनोद सुवेदी ‘क्षितिज’, श्रीशेष श्रेष्ठ, बाल कलाकार जेमिन श्रेष्ठ र स्योन सविक सिंह लगायतका कलाकारको अभिनय रहेको छ । साथै बेलायती अभिनेता जेमी बेकनको समेत महत्वपूर्ण भूमिका समावेश गरिएको छ । एनआरएन समूहको लगानीमा निर्माण भएको यस फिल्मका कार्यकारी निर्माता विनोद सुवेदी ‘क्षितिज’ हुन् । छायाङ्कन बाबु श्रेष्ठ, द्वन्द्व निर्देशन राजु तामाङ, सेट डिजाइन राजु पेन्टर, कला निर्देशन सन्तोष लामा र प्रोडक्सन डिजाइन द्रोणप्रसाद पौडेल ‘ठेउके’ ले सम्हालेका छन् ।
Discussion about this post