‘बलिदान’पछि फेरिएको समीर भट्टको अवतार: ‘१२ गाँउ २’ का लागि भारतमा अभिनय सिक्दै

इटहरी/ नेपाली फिल्म जगतका ‘एक्सन स्टार’ विराज भट्टका छोरा समीर भट्ट यतिबेला फेरि चर्चाको केन्द्रमा छन् । फिल्म ‘बलिदान’को प्रदर्शनपछि उनको करियरलाई लिएर विभिन्न टिका-टिप्पणी भइरहेका बेला, हालै भारतबाट सार्वजनिक भएको उनको एक भिडियोले दर्शकको मन जितेको छ ।

पहिलो फिल्म ‘१२ गाँउ’ बाटै नेपाली फिल्म क्षेत्रमा धमाकेदार इन्ट्री गरेका समिरको दोस्रो फिल्म ‘बलिदान’ले बक्स अफिसमा सोचेजस्तो व्यापार गर्न नसकेपछि धेरैले समीरको नेपाली फिल्म क्षेत्रको भविष्यमाथि प्रश्न उठाएका थिए । कतिपयले उनको करियर ‘डामाडोल’ भएको टिप्पणी समेत गरे । तर, यी सबै आलोचनाका बीच समीरले आफूलाई थप निखार्ने बाटो रोजेका छन् ।

हाल भारतमा रहेका समीर त्यहाँको एक चर्चित स्टुडियोमा अभिनयको विशेष कोर्स गरिरहेका छन् । सामाजिक संजालमा सार्वजनिक भएको एउटा भिडियोमा उनले हिन्दी संवाद दमदार शैलीमा बोलेको देख्न सकिन्छ । उनको यो नयाँ रुप र अभिनयमा आएको निखारता देखेर फ्यानहरूले सामाजिक संजालमा उनको चौतर्फी प्रशंसा गरिरहेका छन् ।

@parikalanewsofficial

समीरले केवल एक्सनमा मात्र होइन, संवाद र इमोसनमा पनि उत्तिकै मिहिनेत गरिरहेका छन् भन्ने यो भिडियोले पुष्टि गर्छ ।समीरको यो मिहिनेतको मुख्य कारण ‘१२ गाउँ २’ लाई मानिएको छ । उनका बुबा विराज भट्ट यतिबेला यस फिल्मको कथा लेखनमा व्यस्त छन् । फिल्ममा समीर नै मुख्य भूमिकामा रहने भएकाले एक्सन र अभिनय दुवैमा ‘पर्फेक्ट’ देखिन उनले भारतमा पसिना बगाइरहेका हुन् ।

‘बलिदान’ बाट ओइलाएका प्रशंसकहरू समीरको यो नयाँ जोस देखेर उत्साहित भएका छन् । यसले के स्पष्ट पार्छ भने, एउटा फिल्मको असफलताले समीरको यात्रा रोकिएको छैन, बरु उनी अझै बलियो भएर पर्दामा फर्किने तयारीमा छन् ।