बागलुङ महोत्सवमा गायिका समीक्षा अधिकारीमाथि मानसिक दुर्व्यवहार

इटहरी/ चर्चित गायिका समीक्षा अधिकारी फेरि एकपटक स्टेज कार्यक्रममा दुर्व्यवहारको शिकार बनेकी छिन् । बागलुङ महोत्सवको सांगीतिक माहोलमा आफ्नो प्रस्तुति दिइरहेकी अधिकारीमाथि दर्शकदीर्घाबाट एक युवकले व्यक्तिगत जीवनलाई लिएर निरन्तर प्रहार गरेपछि उनले जवाफ फर्काउन बाध्य भइन् ।

महोत्सवको माहोल तातिरहेका बेला समीक्षा आफ्ना चर्चित गीतहरू गाउँदै थिइन् । सोही क्रममा दर्शकदीर्घामा रहेका एक पुरुषले उनको विगतको विवादलाई कोट्याउँदै “पल शाह खै ?” भन्दै चर्को स्वरमा हुटिङ गर्न थाले । सुरुमा समीक्षाले ती युवकको टिप्पणीलाई वास्ता नगरी आफ्नो गायनलाई निरन्तरता दिने प्रयास गरिन् ।

तर, ती युवकले एकपछि अर्को गर्दै बारम्बार सोही प्रश्न दोहोर्‍याइरहेपछि समीक्षाले धैर्यता गुमाइन् । सार्वजनिक भएको भिडियोमा समीक्षाले ती युवकलाई नम्र तर कडा शब्दमा प्रतिप्रश्न गरेको देखिन्छ । उनले “तिम्रो दाई हो पल शाह ?” भनेर प्रश्न गर्दै “मलाई नै हेर्न आउने अनि हेर हेर ! ” भन्दै सरल भाषामा जवाफ फर्काएको देखिन्छ ।

@parikalanewsofficial

यस घटनाको सबैभन्दा बिझाउने पक्ष भनेको आयोजकको लाचारीपन देखिएको छ । कलाकारमाथि प्रत्यक्ष रुपमा मानसिक र मौखिक दुर्व्यवहार भइरहँदा पनि स्टेज र दर्शकदीर्घामा खटिएका सुरक्षाकर्मी र आयोजक टोली ‘मूकदर्शक’ बनेर बसेको भिडियोमा प्रस्ट देखिन्छ । कलाकारको सुरक्षा र सम्मान कायम राख्नुपर्ने आयोजकले घटनालाई सामान्य रुपमा लिँदा सामाजिक सञ्जालमा उनीहरूको तीव्र आलोचना भइरहेको छ ।

यो भिडियो सार्वजनिक भएलगत्तै सामाजिक सञ्जाल दुई धारमा बाँडिएको छ । धेरैले कलाकारको व्यक्तिगत जीवन र पेशालाई मिसाउनु गलत भएको भन्दै समीक्षाको साहसको प्रशंसा गरेका छन् । केहीले भने अझै पनि उनलाई पुरानै घटनाको आधारमा ट्रोल गरिरहेका छन्, जसले नेपाली समाजमा महिला कलाकारप्रति हेर्ने दृष्टिकोण अझै संकुचित रहेको दर्शाउँछ । सांगीतिक क्षेत्रमा छोटो समयमै नाम कमाएकी समीक्षाले पटक-पटक यस्ता दुर्व्यवहार झेल्दै आएकी छिन् । तर, सार्वजनिक महोत्सवहरूमा कलाकारको सुरक्षा र मर्यादासम्बन्धी मापदण्ड नहुँदा यस्ता घटना दोहोरिने गरेका छन् ।