मैथिली गीतमा प्रियंका र होम पी. को रोमान्टिक अवतार

इटहरी/ पहिले जसको नाम सुन्नेबित्तिकै दर्शकको अनुहारमा हाँसो छाउँथ्यो, आज उनै कलाकार रोमान्टिक अवतारमा देखिएका छन् । चर्चित हास्य टेलिशृङ्खला ‘मेरि बास्सै’ र ‘बोकेदारी’ श्रीकृष्ण लुइटेलका कमेडी भिडियोमार्फत चिनिएका कलाकार होम पी. भट्टराईले आफ्नो अभिनयको लय बदलेका छन् ।

भट्टराई यतिबेला मैथिली म्युजिक भिडियोमार्फत ‘लभर ब्वाइ’को रूपमा पर्दामा देखिएका हुन् । सप्तकोसीको चिसो पानीको पृष्ठभूमिमा मोडल प्रियंका चौधरीसँग उनले गरेको रोमान्स यतिबेला युट्युवमा सार्वजनिक गरिएको छ । गायक झोटन मेहताको निर्माण र चन्दन शर्माको छायांकन रहेको यस भिडियोमा होम र प्रियंकाको जोडीलाई निकै ‘हट’ र ‘बोल्ड’ अवतारमा प्रस्तुत गरिएको छ । हेर्नुस् भिडियो ।

यसअघि ड्रिम गर्ल, विमान, गोल र बनरक्षक जस्ता नेपाली फिल्ममा आफ्नो अभिनय क्षमता प्रदर्शन गरिसकेका भट्टराई अहिले फरक विधामा जम्नुले उनी एक भर्सटाइल कलाकार हुन् भन्ने प्रमाणित भएको छ । हाल उनी मैथिली संस्कृतिमा आधारित नेपाली फिल्म ‘बहौरिया’को काममा समेत व्यस्त छन्, जुन अहिले सम्पादनको अन्तिम चरणमा छ ।