फिल्म ‘प्रतिवैरम्’को पोस्टरमा देखियो अलग पात्र, अलग दुनियाँ र एउटै महा-विद्रोहको झलक

इटहरी/ पर्दामा जब राजनीति र प्रतिशोधको कथा जोडिन्छ, तब विष्फोट निश्चित हुन्छ । यस्तै विष्फोटको पूर्वसंकेत दिँदै प्रतीक्षित फिल्म ‘प्रतिवैरम्’ले टिमले फस्टलुक पोष्टर सहित मुख्य तीन पात्रहरूको लुक्स सार्वजनिक गरेको छ । रेज इन्टरटेन्मेन्ट र किङ वाईटीको ब्यानरमा निर्माण भइरहेको यो फिल्मले सार्वजनिक गरेका पोस्टरहरू सामान्य प्रचार सामग्री मात्र होइनन्, यी वर्तमान व्यवस्था र सत्ताविरुद्धको ‘युद्धको घोषणा’ जस्तै लाग्छन् ।

मधेस केन्द्रित सामाजिक तथा राजनीतिक विषयवस्तुमा आधारित यस फिल्मको सार्वजनिक पोस्टरले यसको गम्भीर, भावनात्मक र शक्तिशाली कथावस्तुको झलक दिएको छ । पोस्टरमा आगो, पीडा र प्रेमको प्रतीकात्मक संयोजनमार्फत कथाको गहिराइ उजागर गरिएको छ । मुख्य कलाकारद्वय सम्राट दास र सुप्रज्ञा शर्माको सशक्त उपस्थिति पोस्टरको केन्द्रमा छ । पोस्टरले संघर्ष, संवेदना र विद्रोहको भाव एकसाथ प्रस्तुत गरेको देखिन्छ ।

मुख्य अभिनेता सम्राट दास पोस्टरमा एकदमै फरक र प्रभावशाली अवतारमा देखिएका छन् । उनको आँखाको भाव, शारीरिक भाषा र क्यारेक्टर लुकले पात्रभित्रको आक्रोश, संघर्ष र जिम्मेवारीलाई जीवन्त बनाएको छ । निर्देशक रोशन दासका अनुसार ‘प्रतिवैरम’ सम्राट दासको डेब्यु फिल्म भए पनि यो भूमिका उनको करियरकै महत्वपूर्ण र सम्झनलायक बन्ने विश्वास लिइएको छ ।

@parikalanewsofficial

त्यसैगरी मुख्य अभिनेत्री सुप्रज्ञा शर्माको भावनात्मक प्रस्तुति पनि पोस्टरमा विशेष रूपमा उभिएको छ । उनको अनुहारमा झल्किएको पीडा, प्रेम र भरोसाले कथाको मानवीय पक्षलाई अझ सशक्त बनाएको छ, जसले पोस्टरलाई थप प्रभावशाली बनाएको छ । निर्देशक रोशन दासले सिर्जना गरेको यो रक्ताम्मे दुनियाँमा यता अन्य तीन पात्रहरू तीन अलग-अलग मनोविज्ञान बोकेर उभिएका छन् । सार्वजनिक पोस्टरले फिल्मको कथावस्तु कति गम्भीर र आक्रामक छ भन्ने स्पष्ट पारेको छ ।

पहिलो क्यारेक्टर पोष्टरमा हातमा चुरोट र आँखामा गहिरो आक्रोश बोकेका रोन्नी यादव ‘सञ्जय’ को रूपमा प्रस्तुत भएका छन् । उनको यो रूपले भन्छ, उनी बोल्नमा भन्दा केही गरेर देखाउनमा विश्वास गर्छन् । “सञ्जय चिच्याउँदैन, तर उसको कदमले व्यवस्था नै हल्लाउँछ ।” यस्तै दोश्रो पोष्टरमा अनुभवी अभिनेता प्रदीप ढकाल ‘रवि कुमार’ को भूमिकामा निकै अर्थपूर्ण देखिएका छन् ।

हात जोडेर उभिएको उनको मुद्रामा नम्रता देखिए पनि अनुहारमा राजनीतिको चतुर खेल प्रस्ट झल्किन्छ । उनी सिस्टमसँग लड्ने होइन, सिस्टम चलाउने पात्र हुन् । “रवि कुमारको मौनता भित्र सिंगो सत्ता लुकेको छ ।” यता तेश्रो पोष्टरमा जटाधारी कपाल र रौद्र रूपमा देखिएका आशिष डीके ‘रणजीत’ बनेर दर्शकलाई तर्साउन तयार छन् । उनको यो अवतारले उनी फिल्मको कथा बदल्ने ‘गेम चेन्जर’ पात्र भएको संकेत गर्छ । “रणजीत आउँछ, तब कथा बाँच्दैन, इतिहास रचिन्छ ।”

निर्देशक रोशन दासका अनुसार ‘प्रतिवैरम्’को कथा सानो क्यानभासमा अट्ने खालको छैन । त्यसैले त यो फिल्म नेपाली, हिन्दी, मैथिली र भोजपुरी गरी चार भाषामा एकसाथ निर्माण भइरहेको छ । रोजगारको खोजीदेखि राजनीतिको फोहोरी खेलसम्मको कथा समेट्ने यो फिल्म २०८३ जेठ मा रिलिज हुने पक्का भएको छ । पोस्टर सार्वजनिक भएसँगै एउटा कुरा पक्का भएको छ, ‘‘प्रतिवैरम्’मा पात्रहरूले केवल संवाद बोल्ने छैनन्, उनीहरूले आगो ओकल्ने छन् ।