आकाश, स्वस्तिमा, केकी र साम्राज्ञीको नाम र तस्वीर प्रयोग गरेर ह्वाट्सएप र भाइबरमा ठगी प्रयास

इटहरी/ पछिल्लो समय प्रविधिको दुरुपयोग गर्दै नेपाली कलाकारहरूको नाममा ठगी गर्ने गिरोह सक्रिय भएको पाइएको छ । विशेष गरी ह्वाट्सएप तथा भाइबर जस्ता म्यासेजिङ एपहरूमा चर्चित नेपाली सेलिब्रेटीहरूको नाम र तस्बिर राखेर पैसा माग्ने क्रम बढेपछि कलाकारहरूले गम्भीर आपत्ति जनाएका छन् ।

आफ्नो पहिचान दुरुपयोग गरी साथीभाइ तथा शुभचिन्तकहरूसँग रकम मागिएको जानकारी पाएपछि अभिनेत्रीहरू केकी अधिकारी, स्वस्तिमा खड्का, साम्राज्ञी राज्यलक्ष्मी शाह र अभिनेता आकाश श्रेष्ठले सामाजिक सञ्जालमार्फत सबैलाई सचेत रहन आग्रह गरेका हुन् । उनीहरूले ठगी गर्न खोजिएको च्याटको ‘स्क्रिनसट’ नै सार्वजनिक गर्दै यस्ता भ्रामक सन्देशको विश्वास नगर्न अनुरोध गरेका छन् ।

अभिनेत्री स्वस्तिमा खड्काले आफूलाई जोडेर पैसा माग्ने गिरोह सक्रिय रहेको भन्दै फेसबुकमा स्क्रिनसट सहित लेखेकी छन्, “सावधान…! मेरो नामको दुरुपयोग गर्दै मेरा नजिकका साथीहरूलाई WhatsApp/Viber मा पैसा माग्दै गरेको भेटिएको हुनाले त्यस्ता म्यासेजहरूमा नझुक्किनु हुन सबैमा जानकारी गराउन चाहन्छु।” स्वस्तिमाले सार्वजनीक गरेको स्क्रीनसटमा त उनले उल्टै स्क्यामर नै छक्क पर्ने रिप्लाई गरेको देखिन्छ । उनलाई आफू देश भन्दा भइरहेको समस्या देखाएर ५० हजार सापटी मागिएको छ । तर, स्वस्तिमाले आफ्नो बैंक एकाउन्ट एक्टिभ गर्न २० हजार आवश्यक परेको र सो रकम हाल्दिनु र बरु त्यसपछि आफूले ७० हजार दिने जवाफ फर्काएकी छन् । स्वस्तिमाको सो रिप्लाइलाई धेरैले राम्रो जवाफ फर्काएको भनेर कमेन्टमा प्रतिक्रिया दिएका छन् ।

@parikalanewsofficial

यस्तै, अभिनेत्री केकी अधिकारीले पनि आफ्नो नाम र तस्बिरको दुरुपयोग भएको भन्दै कानुनी कारबाहीको चेतावनी दिएकी छन् । उनले लेखेकी छन्, “मेरो नाम र तस्वीरको दुरुपयोग गरि Viber/WhatsApp मार्फत पैसा मागिरहेको भन्ने जानकारी प्राप्त भएको छ । यो कार्य कानुनी रुपमा पनि दण्डनिय छ । र सम्पूर्णलाई सजक रहन हार्दिक अनुरोध गर्दछु।”

अर्की अभिनेत्री साम्राज्ञी राज्यलक्ष्मी शाहले आफ्नो इन्स्टाग्राम स्टोरीमा फेक अकाउन्टको स्क्रिनसट राख्दै स्पष्टीकरण दिएकी छन् । उनले लेखेकी छन्, “सबैजना, यो म होइन !! यो ठगीमा नफस्नुहोला !!”

यसैगरी, अभिनेता आकाश श्रेष्ठले प्रविधिको दुरुपयोगका घटनाप्रति चिन्ता व्यक्त गरेका छन् । उनले एक नम्बरबाट आफ्नो नाममा आर्थिक सहयोग मागिएको बताउँदै भनेका छन्, “यदि कसैलाई यस्ता किसिमका सन्देशहरू प्राप्त भएमा कृपया सतर्क रहनुहोला र कुनै प्रतिक्रिया नदिनुहोला, किनकि ती पूर्ण रूपमा भ्रामक तथा नक्कली हुन् ।”

कलाकारहरुले सार्वजनीक गरेको क्रिनसटमा विभिन्न कारण देखाउँदै २५/३० हजार देखि ५० हजार सम्म पैसा मागिएको छ । कलाकारहरूले आफ्नो आधिकारिक सामाजिक सञ्जाल बाहेक अन्य अपरिचित नम्बर वा अकाउन्टबाट आउने शंकास्पद सन्देशहरूको जवाफ नदिन र आर्थिक कारोबार नगर्न आफ्ना फ्यान तथा आफन्तहरूलाई विशेष आग्रह गरेका छन् ।