फिल्म ‘गोबर गणेश’को शीर्ष गीतमा देखिए बल्छी र वर्षा

इटहरी/ आगामी माघ १ गते अर्थात माघे संक्रान्तिको छेको पारेर प्रदर्शनको तयारीमा रहेको फिल्म ‘गोबर गणेश’ ले आफ्नो सांगीतिक प्रचार सुरु गरेको छ । हास्य विधामा आधारित यस फिल्मको शीर्ष गीत सार्वजनिक भएसँगै फिल्मको कथासार र मुड पनि खुलेको छ ।

सार्वजनिक ‘गोबर गणेश’ बोलको ‘क्याची’ गीतमा बाबुल गिरीको शब्द तथा संगीत रहेको छ भने फिल्मका निर्देशक तथा मुख्य कलाकार मरिचमान श्रेष्ठ (बल्छी धुर्वे) ले नै स्वर दिएका छन् । रमाइलो शैलीमा तयार पारिएको यो गीतले हाम्रो समाजको एउटा गम्भीर मनोविज्ञानलाई व्यंग्य गरेको छ । मानिस व्यवहारिक रूपमा जतिसुकै ‘परफेक्ट’ भए पनि यदि पढाइमा कमजोर छ भने कसरी समाज र साथीभाइको नजरमा ‘गोबर गणेश’ बन्छ भन्ने कुरालाई गीतले प्रष्ट्याएको छ ।

पढाइ बिग्रिँदा घट्ने आत्मविश्वास र त्यसले पार्ने नकारात्मक प्रभावलाई गीतको भिडियो, शब्द र संगीतले रमाइलो ढंगले प्रस्तुत गरेको छ । गम्भीर विष्टले कोरियोग्राफी गरेको यस गीतको भिडियोमा मरिचमान श्रेष्ठ केन्द्रमा छन् । उनलाई अभिनेत्री वर्षा शिवाकोटी र अभिनेता निर्मल शर्माले साथ दिएका छन् । गीतको भिडियोले चलचित्र पूर्ण रूपमा कमेडी बेसमा रहेको संकेत गर्छ । हेर्नुस् भिडियो ।

बल्छी धुर्वे फिल्मसको प्रस्तुतिमा निर्माण भइरहेको यो फिल्म हाल पोस्ट-प्रोडक्सनको चरणमा छ । फिल्ममा बल्छी र वर्षाका अलावा विनोद न्यौपाने, पदम तामाङ, लक्ष्मीनाथ तिमलसेना, सन्तोष बानिया, सन्दीप लामा, माओत्से गुरुङ, सीतादेवी तिमल्सिना, पुजन घिमिरे (पुकु), बुद्धि तामाङ, विशाल पहाडी, रमेश बुढाथोकी, स्वस्तिका लामिछाने लगायतका कलाकारहरूको अभिनय रहेको छ ।

@parikalanewsofficial

फिल्ममा शिवराम श्रेष्ठको छायांकन र विपीन मल्लको सम्पादन रहनेछ भने योगेश काजी शाहले ब्याकग्राउन्ड म्युजिक तयार पारेका छन् । तारानाथ न्यौपाने मुख्य सहायक निर्देशक रहेको फिल्मको प्रोडक्सन शंकर पाण्डेले सम्हालेका छन् । टौवा स्टुडियोले पब्लिसिटी डिजाइन गरेको यो फिल्मको डिजिटल पार्टनर ओएसआर डिजिटल हो भने नेपालभरको वितरणको जिम्मा श्री ब्याकटेस इन्टरटेनमेन्टले लिएको छ ।