सुपरहिट फिल्म ‘खुस्मा’ युट्युबमा रिलिज, रुकुम मैकोटलाई १६ करोडबढी भ्युज

इटहरी/ लामो प्रतीक्षापछि गत वर्षको सुपरहिट नेपाली फिल्म ‘खुस्मा’ अन्ततः युट्युबमा सार्वजनिक भएको छ । हलमा प्रदर्शन हुँदा दर्शकको मन जित्न सफल यो फिल्म अब विश्वभरका दर्शकले घरमै बसेर हेर्न पाउने भएका छन् । दर्शकहरूले व्यग्र प्रतीक्षा गरिरहेको यो फिल्म ‘केन्द्र मोसन पिक्चर्स’को आधिकारिक युट्युब च्यानल मार्फत सार्वजनिक गरिएको हो ।

हलमा राम्रो व्यापार गरेको र धेरैको प्रशंसा बटुलेको हुनाले युट्युब रिलिजमा पनि यसले आक्रमक भ्युज पाउने अपेक्षा गरिएको छ । यो फिल्मको चर्चा चुलिनुको मुख्य कारण यसको लोकप्रिय गीत “रुकुम मैकोट” पनि हो । एसडी योगी र शान्ति श्री परियारको स्वर रहेको यो गीतले युट्युबमा नेपाली संगीतको इतिहासमै दुर्लभ रेकर्ड कायम गरेको छ । हालसम्म यो गीतले १६२ मिलियन अर्थात् १६ करोड २० लाख भन्दा बढी भ्युज प्राप्त गरिसकेको छ । हेर्नुस् पूरा फिल्म ।

टिकटक र रिल्समा समेत यो गीत लामो समयसम्म ट्रेन्डिङमा रहँदै आएको थियो । गीतको सफलताले पनि फिल्मलाई युट्युबमा दर्शक तान्न ठूलो मद्दत पुग्ने देखिन्छ । अशोक थापा मगरको लेखन तथा निर्देशनमा बनेको यो फिल्मले माओवादी द्वन्द्वकाल (जनयुद्ध) को पृष्ठभूमिमा हुर्किएको एउटा प्रेमकथालाई प्रस्तुत गरेको छ । फिल्ममा मगर समुदायको संस्कृति र परिवेशलाई जीवन्त रूपमा उतारिएको छ ।

फिल्मका निर्माताहरूले हलमा जस्तै डिजिटल प्लेटफर्ममा पनि दर्शकको माया पाउने विश्वास व्यक्त गरेका छन् । यो फिल्म निर्माण युनिट यतिबेला जलाकी नामक फिल्म निर्माणमा जुटेको छ । एम मिडिया प्रालिको ब्यानरमा निर्माण भएको फिल्मको लेखन तथा निर्देशन अशोक थापा मगरले गरेका हुन् । उनले यसअघि केही डकुमेन्ट्री सिनेमा लेखन तथा निर्देशन गरेपनि यो नै ठुलो पर्दाको पहिलो निर्देशकिय फिल्म हो ।

@parikalanewsofficial

फिल्मको निर्मातामा विर बहादुर लामा, चन्द्र बहादुर भट्टचन, मान बहादुर धनाह मगर र बेतान मगर छन्, भने सह-निर्माता सुस्मिता बुढाथोकी हुन् । फिल्ममा दिपक बज्राचार्यको छायांकन रहेको छ । फिल्ममा धिरज र उपासनाका अलवा माओत्से गुरुङ, खड्क बहादुर पुन (खबपु), सुजाता राई, विजय सुब्बा, राज थापा काउचा, अस्तित्व भट्टचन, संगीता थापा मगर, अरुन मगर, राजु रेग्मी मगर, सारा राई, श्वेता मिश्र, विवेश मगर लगायतका कलाकारको अभिनय रहेको छ ।