इटहरी/ ‘दयारानी’ जस्तो हिट फिल्म पस्किएका निर्देशक तथा कलाकार माओत्से गुरुङले आफ्नो नयाँ निर्देशकीय यात्रा सुरु गरेका छन् । गुरुङ फिल्मका ‘गडफादर’ मानिने माओत्सेको लेखन तथा निर्देशनमा बन्ने फिल्म ‘पेन्सन पट्टा’को शुभमुहूर्तसँगै छायांकन आरम्भ गरिएको छ । कास्कीको रमणीय पर्यटकीय गाउँ ताङतिङबाट फिल्मको छायांकन सुरु भएको निर्माण पक्षले जनाएको छ । फिल्मको सम्पूर्ण छायांकन सोही क्षेत्रका सुन्दर लोकेसनहरुमा करिब ३५ दिनसम्म चल्नेछ ।
फिल्मको नाम सुन्दा धेरैलाई यो भूतपूर्व लाहुरेको परम्परागत कथा हो भन्ने लाग्न सक्छ । तर, निर्देशक गुरुङले यो भ्रम चिर्दै फिल्मको कथावस्तु फरक रहेको बताएका छन् । उनका अनुसार, यो फिल्मले एक लोभी मान्छे कसरी दानी बन्न पुग्छ भन्ने मनोवैज्ञानिक र सामाजिक कथा पेश गर्नेछ । माओत्से गुरुङ फिल्मस्को ब्यानरमा निर्माण भइरहेको यो फिल्ममा कलाकारहरूको ठूलो र बलियो लाइनअप रहेको छ । फिल्मको मुख्य भूमिकामा बक्स अफिसका राजा दयाहाङ राई देखिनेछन् ।
उनीसँगै दिग्गज अभिनेता सुनिल थापा, पशुपति राई, गौमाया गुरुङ, बुद्धि तामाङ, विल्सन विक्रम राई, राज थापा काउछा, लुनिभा तुलाधर, विश्वास गुरुङ, माया गुरुङ र यासिली राई लगायतका कलाकारहरूको अभिनय रहनेछ । फिल्ममा निर्देशक माओत्से गुरुङ स्वयंको पनि लगानी रहेको छ । अन्य निर्माताहरूमा मीन कोन्मे गुरुङ (सिकलेस), भोज बहादुर गुरुङ (युके) र सपना गुरुङ रहेका छन् ।
@parikalanewsofficial
फिल्मको छायांकन सुशन प्रजापति, संगीत झुमा लिम्बु, मनोज थापा मगर र शिव बराइली, कास्टिङ डिरेक्टर सुरज तमु र प्रोडक्सन म्यानेजर डिबी गुरुङ रहेका छन् । विगतमा गुरुङ भाषाका फिल्महरू निर्देशन गरेर अनुभव बटुलेका माओत्सेले ‘दयारानी’ मार्फत नेपाली मूलधारको फिल्म निर्देशनमा सफल डेब्यु गरेका थिए । अभिनयमा समेत अब्बल मानिने उनी पछिल्लो समय लेखन र निर्देशनमा थप सक्रिय देखिएका छन् ।
Discussion about this post