‘रमिताको पिरती’ गीत: थाइल्याण्डको समुद्री किनारमा आना र समीरको रोमान्स

इटहरी/ थाइल्याण्डका मनमोहक दृश्यहरू, अनि त्यही सुन्दर पृष्ठभूमिमा नायिका आना शर्मा र नव-नायक समीर श्रेष्ठको प्रेमिल निकटता । माघ २३ गतेलाई प्रदर्शन मिति तोकेको फिल्म ‘रमिताको पिरती’ले दर्शकको मन जित्ने उद्देश्यसहित आफ्नो बलियो सांगीतिक कोशेली सार्वजनीक गरेको छ । युट्युवमा बिहीबार यो फिल्मको नयाँ गीत ‘तिमी भए काफी’ सार्वजनिक गरियो ।

सार्वजनिक गीतमा आना र समीरको जोडी निकै सुहाएको देखिन्छ । समीर श्रेष्ठकै आवाज र सास्वतको संगीत रहेको यो गीतमा आना थाइल्याण्डको ‘लोकेशन’मा निकै खुलेकी छिन् । भिडियोमा ‘झोले’को सिनेम्याटोग्राफीले थाइल्याण्डको सौन्दर्य र कलाकारको रोमान्सलाई निकै कलात्मक ढंगले कैद गरेको छ । गीतको भिडियोले नै फिल्म एक त्रिकोणात्मक वा गहिरो प्रेमकथामा आधारित रहेको संकेत गर्छ । हेर्नुस् भिडियो ।

सार्वजनिक टिजर र पोस्टरबाटै चर्चा बटुलिरहेको यो फिल्मले एक युवतीको जीवन संघर्ष, प्रेम र आरोह-अवरोहको कथा पेश गर्छ । विशेषगरी नायिका आना शर्माको यसअघि नदेखिएको ‘गेटअप’ र शैलीले युवापुस्तामा कौतुहलता जगाएको छ । सुदिप्ताको लेखन तथा निर्देशन रहेको यो फिल्म विषयवस्तुका हिसाबले पनि अन्यभन्दा फरक रहेको निर्माण पक्षको दाबी छ ।

सागर लम्साल निर्माता रहेको यस फिल्ममा आना र समीरसँगै धिरज मगर, विनय श्रेष्ठ, गौमाया गुरुङ, पशुपति राई, रेनु योगीत, गियना, थिन्ले लामो लगायतका कलाकारहरूको अभिनय हेर्न पाइनेछ । आना शर्मा र सन्तोष लम्साल कार्यकारी निर्माता रहेको फिल्ममा आरपी प्रोडक्सन, गणेश पाण्डे, सुभाष कोइराला र प्रवेश लामिछाने एसोसिएट निर्माताका रूपमा जोडिएका छन् ।

@parikalanewsofficial

प्राविधिक रूपमा पनि फिल्म अब्बल मानिएको छ । शिशिर विशाङ्खेको डीओपी, सुनिल सिवाकोटीको सम्पादन र कृतिका बरालको कोरियोग्राफी रहेको फिल्ममा सुशान्त केसी, समीर श्रेष्ठ, महेश काफ्ले, अस्मिता अधिकारी र कुशल पोखरेलको संगीत संयोजन छ । फरक स्वाद र नयाँपनको खोजीमा रहेका दर्शकका लागि ‘रमिताको पिरती’ कोसेढुङ्गा सावित हुने अपेक्षा गरिएको छ ।