ब्लकबस्टर निर्देशक सरोज पौडेलको फिल्म ‘सिन्दुरे जात्रा’ले कस्तो कथा भन्छ ?

इटहरी/ ब्लकबस्टर फिल्म ‘पूर्ण बहादुरको सारङ्गी’ का निर्देशक सरोज पौडेलले आफ्नो नयाँ फिल्म ‘सिन्दुरे जात्रा’ निर्माणको औपचारिक घोषणा गरेका छन् । सारंगी फिल्म्सको प्रस्तुतिमा बन्ने यस फिल्मको घोषणाले फिल्मवृत्तमा चर्चा पाए पनि निर्देशक पौडेलले भने कथावस्तु र कलाकारबारे गोप्यता कायम राखेका छन् ।

फिल्मको शीर्षक ‘सिन्दुरे जात्रा’ ले नुवाकोटमा हुने प्रसिद्ध जात्राको कथा बोकेको अनुमान गरिए पनि निर्देशक पौडेलले यो अनुमानलाई सिधै खण्डन गरिदिएका छन् । “नुवाकोटमा हुँदै आएको सिन्दुरे जात्रा नै फिल्मको विषय हो भनेर बुझ्नु भएको हो भने त्यो चाहिँ पूर्णतया गल्ती नै हो,” निर्देशक पौडेलले स्पष्ट पारे ।

उनका अनुसार, टाइटल अनाउन्समेन्ट टिजरमा सिन्दुरे जात्राको छनक देखिए पनि यो फिल्म जात्राको कथामा केन्द्रित नरहेको र केवल नामसँग कहीँ कतै मात्र जोडिन सक्ने बताएका छन् । जेठ महिनादेखि छायांकनमा जाने तयारी गरिएको यस फिल्मको कथा निर्देशक पौडेल स्वयंको रहेको छ । यसमा सबिन अधिकारी र बसन्त न्यौपानेले लेखनमा साथ दिएका छन् ।

@parikalanewsofficial

प्रभाकर श्रेष्ठ निर्माता रहेको ‘सिन्दुरे जात्रा’ लाई आरआर फिल्मसले वितरण गर्नेछ भने डिजिटल पार्टनरमा ओएसआर डिजिटल रहनेछ । निर्देशक पौडेलले कथावस्तु, कलाकार र रिलिज मिति लगायतका अन्य महत्वपूर्ण जानकारीहरू केही समयपछि सार्वजनिक गर्ने बताएका छन् । यसअघि पौडेल निर्देशित तथा लिखित फिल्म ‘कोशेढुङ्गा’ प्रदर्शनमा आएको थियो ।