‘बिगुल’को टिजरमा फिल्ममै नभएको दृश्य राखेको भन्दै अभिनेत्री बेनिशा हमाल आक्रोसित

इटहरी/ आगामी माघ ९ गते प्रदर्शनको तयारीमा रहेको फिल्म ‘बिगुल’ को टिजर सार्वजनिक भएसँगै विवादमा तानिएको छ । आइतबार सार्वजनिक सवा एक मिनेट लामो टिजरले फिल्मप्रति कौतूहलता बढाउने अपेक्षा गरिए पनि फिल्मकी मुख्य अभिनेत्री बेनिशा हमालले भने निर्माण पक्षको प्रचार शैलीप्रति कडा आपत्ति जनाएकी छन् ।

१४ वर्षदेखि फिल्म क्षेत्रमा सक्रिय अभिनेत्री हमालले टिजर सार्वजनिक भएलगत्तै फेसबुकमार्फत आफ्नो असन्तुष्टि पोखेकी हुन् । उनले फिल्ममा हुँदै नभएको दृश्य र विषयवस्तुलाई केवल प्रचारका लागि टिजरमा समावेश गरिएको भन्दै आक्रोश व्यक्त गरेकी छन् । उनले लेखेकी छन्, “एक कलाकारको रूपमा म यो उद्योगमा १४ वर्षदेखि काम गर्दै आएको छु… फिल्मसँग सम्बन्ध नै नभएका विषय वा अरूको भावनालाई प्रचारका लागि प्रयोग गर्ने प्रवृत्तिप्रति म असहमत छु।”

उनले अगाडि थपेकी छन्, “यदि फिल्ममै नभएको कुनै कुरा केवल प्रचारका लागि टिजरमा देखाइन्छ भने, म त्यस्तो अभ्यासको समर्थन गर्दिनँ र त्यसको हिस्सा बन्न चाहन्नँ।” सार्वजनिक भएको टिजरमा देशको वर्तमान राजनीति, देशप्रेम, जिम्मेवारी र ‘जेन्जी’ पुस्ताको आन्दोलनको सन्दर्भलाई प्राथमिकताका साथ देखाइएको छ । रमेश कोइरालाको निर्देशन र दिनेश कोइरालाको निर्माण तथा लेखन रहेको यो फिल्मले राजनीति, परिवार र समाजको कथालाई मनोरञ्जनका साथ प्रस्तुत गर्ने प्रयास गरेको छ । हेर्नुस् टिजर ।

यसअघि ‘मन मनमा’, ‘लीला’ र ‘नीरमाया’ जस्ता फिल्म निर्देशन गरिसकेका निर्देशक कोइरालाले फिल्मलाई केवल मनोरञ्जन मात्र नभई विचारको रूपमा पनि हेर्नुपर्ने बताएका छन् । उनले भने, “हरेक नागरिकलाई आफ्नो देश र समाजप्रति जिम्मेवार बनाउन फिल्मले भूमिका खेल्न सक्छ।” जेन्जी पुस्ताको माग र देश विकासको चाहनासँग मिल्दोजुल्दो कथा भनिएको ‘बिगुल’ मा बेनिशा हमालसँगै नरेन खड्का, रमेश बुढाथोकी, नीर शाह, सरोज खनाल, हेमन्त बुढाथोकी, शिशिर वाङ्देल लगायतका कलाकारहरूको अभिनय रहेको छ ।

@parikalanewsofficial

म्याग्नोलिया ग्रुपको ब्यानरमा कल्पना पौडेलको प्रस्तुति रहेको यस फिल्ममा शिव ढकालको छायांकन, प्रदीप भारद्वाज र मौनता श्रेष्ठको पटकथा तथा संवाद, र तारा थापा ‘किम्भे’ को सम्पादन रहेको छ । अभिनेत्रीको यो सार्वजनिक बहिष्कार र असन्तुष्टिले फिल्मको प्रचारमा कस्तो असर पार्छ, त्यो भने हेर्न बाँकी नै छ ।