‘झरिपछिको इन्द्रेणी’: पर्दाका ‘भेट्रान’देखि ‘जेन-जी’सम्मको संगम

इटहरी/ लामो समयदेखि नेपाली हास्यव्यङ्ग्य क्षेत्रमा आफ्नो बेग्लै पहिचान बनाएका अर्जुन घिमिरे (पाँडे) अब ठूलो पर्दाको फिल्म निर्देशकका रूपमा दर्शकसामु आउँदैछन् । यही पौष ४ गतेदेखि प्रदर्शनमा आउन लागेको उनको डेब्यु निर्देशकीय फिल्म ‘झरिपछिको इन्द्रेणी’लाई नेपाली फिल्म क्षेत्रमा पुस्ताको संगम (फ्युजन)का रूपमा हेरिएको छ । यो फिल्मको सबैभन्दा बलियो पक्ष यसको कास्टिङ हो । फिल्ममा दुई दशकअघि सानो र ठूलो पर्दामा एकछत्र राज गरेका अनुभवी कलाकारदेखि अहिलेका ‘फ्रेस’ अनुहारहरूसम्मको जमघट देख्न सकिन्छ ।

निर्देशक घिमिरेले यसलाई ‘कम्प्याक्ट टिम’को संज्ञा दिएका छन् । विशेषगरी, दुई दशकअघि सानो पर्दामा लोकप्रिय रहेका र ठूलो पर्दामा समेत जमेका अभिनेता गणेश उप्रेती यो फिल्ममार्फत लामो अन्तरालपछि कमब्याक गर्दैछन् । उनी छायांकनका लागि अमेरिकाबाट नेपाल फर्किएका हुन् । साथमा, आफ्नो समयका ‘ठूलो पर्दाका बाघ’ मानिने अभिनेता रमेश उप्रेती र गणेश उप्रेतीको अभिनयको जुगलबन्दी यसमा हेर्न पाइनेछ ।

साथै, सफल निर्देशक तथा अभिनेत्री दीपाश्री निरौलाको उपस्थितिले फिल्मलाई थप वजनदार बनाएको छ । लोकप्रिय टेलिसिरियल ‘सक्किगोनी’ मार्फत घर–घरमा चिनिएका अर्जुन घिमिरे (पाँडे)ले यही फिल्मबाट फिचर फिल्म निर्देशनमा डेब्यु गरेका हुन् । सानो पर्दामा कमेडीका बादशाह मानिने घिमिरेको यो प्रयासमा हास्यरसका साथै गम्भीर सामाजिक मुद्दाको समिश्रण रहने विश्वास गरिएको छ ।

@parikalanewsofficial

‘झरिपछिको इन्द्रेणी’ केवल मनोरञ्जन मात्र नभएर देशको वर्तमान अवस्थाको चित्रण पनि हो । फिल्ममा अहिलेको राजनीतिक अस्थिरता, त्यसले जनतामा पारेको असर र विशेषगरी ‘जेन–जी’ युवापुस्ताको मनोविज्ञानलाई देखाइएको छ । फिल्मकी कलाकार प्रियना आचार्य ‘मुन्नी’ भन्छिन्, ‘‘यसमा युवाहरूको आक्रोश, देशमा सिस्टम नहुँदाको पीडा र भविष्यप्रतिको चिन्ताले विदेशिन बाध्य नेपालीको कथा छ । हामीले कथामा जे देखाउन खोजेका छौं, त्यो अहिले समाजमा भइरहेको ‘जेन-जी प्रोटेस्ट’ सँग मेल खान्छ ।’’

फिल्मबाट अभिनेता विमोचन दवाडी र अभिनेत्री जेसिका पोखरेलले नेपालि फिल्ममा डेब्यु गर्दैछन् । विमोचन आफ्नो मिहिनेत र फिल्मको कथावस्तुले दर्शकको मन जित्नेमा विश्वस्त छन् भने जेसिका यसलाई समसामयिक कथा भन्न रुचाउँछिन् । ‘‘देशमा अहिले जे भइरहेको छ, त्यो हुनुभन्दा अगाडि नै स्क्रिप्ट लेखिएको थियो । सायद टिमलाई भविष्यको अनुमान थियो,’’ जेसिकाले भनिन् ।

नागराज इन्टरटेन्मेन्ट प्रालिको ब्यानरमा निर्माण भएको यो फिल्ममा प्रकाश घिमिरे, सरिता गिरी, देशभक्त खनाल, निर्मल शर्मा, कृष्ण शिवाकोटी लगायतका कलाकारहरूको पनि अभिनय रहेको छ । फिल्मको पटकथा तथा संवाद गणेश कार्की र विशाल घिमिरेले लेखेका हुन् भने कथा स्वयं निर्देशक अर्जुन घिमिरेको हो । बुद्ध थापाले छायांकन गरेको फिल्ममा अनिशा सेन्दाङ लिम्बु निर्मात्री रहेकी छिन् । बाल कलाकार दिप्सन चिलवालको अभिनय तथा मोडल अञ्जली अधिकारी र कोरियोग्राफर प्रदीप लामाको विशेष भूमिका रहेको ‘झरिपछिको इन्द्रेणी’ले दर्शकलाई हलसम्म तान्ने निर्माण पक्षको अपेक्षा छ ।