‘अब अति भयो’ भन्दै भाइरल क्लिप र गालीगलौजपछि कविता नेपालीको आक्रोस

इटहरी/ चर्चित डान्सर, अभिनेत्री तथा ‘हिमालयन रोडिज’ सिजन ७ की ग्याङ लिडर कविता नेपालीले सामाजिक सञ्जालमा भाइरल भइरहेको एक भिडियो क्लिप र त्यसमा आएका नकारात्मक टिप्पणीहरूप्रति कडा आपत्ति जनाएकी छन् । पछिल्लो समय रियालिटी शो ‘हिमालयन रोडिज’को छायाङ्कनका क्रममा खिचिएको एक ‘छोटो र काटिएको’ भिडियो क्लिप सामाजिक सञ्जालमा भाइरल भइरहेको छ । उक्त भिडियोमा कविता केही आक्रोसित र भावुक देखिएकी छन् ।

पूरा सन्दर्भ नबुझी उक्त क्लिपको आधारमा मानिसहरूले उनीमाथि व्यक्तिगत गालीगलौज र ट्रोल बनाउन थालेपछि उनले सामाजिक सञ्जाल मार्फत आफ्नो मौनता तोडेकी हुन् । कविताले आफ्नो स्ट्याटसमा लेखेकी छन्, “सन्दर्भ नै नबुझी एउटा छोटो क्लिप सेयर गरेर मानिसहरूले धारणा बनाइरहेका छन् । त्यो क्लिपले मेरो नाम प्रयोग गरेर अरूलाई भ्युज र चर्चा कमाउन फाइदा पुगिरहेको छ, जबकि वास्तविक कुरा र मेरो मेहनत त्यहाँ देखाइएको छैन ।”

उनले आफूले जीवनमा एक्लै सङ्घर्ष गरेर यहाँसम्म आइपुगेको र कुनै पनि नकारात्मक वा फेक कुराको हिस्सा बन्न नचाहेको स्पष्ट पारेकी छन् । पूरा एपिसोड नै नहेरी मानिसहरूले गरेको गालीगलौजले आफूलाई चोट पुगेको उनले बताएकी छन् । भाइरल भइरहेका क्लिपहरूमा कविता अन्य ग्याङ लिडर वा प्रतिस्पर्धीहरूसँगको विवाद वा बहसको क्रममा देखिएकी छन् । ‘रोडिज’ जस्ता रियालिटी शोमा हुने ड्रामा र विवाद सामान्य मानिए पनि, यसपटक कविताले यसलाई ‘अति भएको’ भन्दै प्रतिक्रिया दिएकी हुन् ।

@parikalanewsofficial

उनले यसअघि अभिनेत्री दिया मास्केको स्थानमा नयाँ ग्याङ लिडरका रूपमा रोडिजमा प्रवेश गरेकी थिइन्, जसलाई लिएर सुरुदेखि नै दर्शकहरूमा मिश्रित प्रतिक्रिया थियो । आफ्ना शुभचिन्तकहरूका लागि भन्दै कविताले भोलि सोसल मिडियामा ‘लाइभ’ आउने बताएकी छन् । उनले स्पष्टीकरण दिन नभई आफूलाई माया गर्नेहरूका लागि लाइभ आउन लागेको लेखेकी छन् ।

साथै, उनले ‘हेटर्स’ लाई लक्षित गर्दै लेखेकी छन्, “जे मन लाग्छ गर, तिमीहरूको कुराले मलाई केही फरक पार्दैन ।” पछिल्लो समय सगरमाथा आरोहण गरेर चर्चा कमाएकी कविता ‘बुगी उगी’ डान्स रियालिटी शोबाट उदाएकी कलाकार हुन् । उनी अहिले चलचित्र र रियालिटी शो दुवैमा सक्रिय छिन् । उनको अभिनय रहेको फिल्म ‘एक्लो’ यही पौष १७ गतेदेखि देशव्यापी प्रदर्शनमा आउँदैछ ।