धरानको ‘शिव सिनेमा’अब मल्टिप्लेक्स बन्ने, आगामी वैशाख १ गतेदेखि सञ्चालनमा ल्याउने तयारी

इटहरी/ कोशी प्रदेशको प्रमुख व्यापारिक तथा पर्यटकीय केन्द्र मध्येको एक मानिएको धरानमा अत्याधुनिक मल्टिप्लेक्स फिल्म हल सञ्चालनमा आउने भएको छ । फिल्म निर्माता तथा निर्देशक रिमेश अधिकारी र सुरज खड्काको समूहले धरानको ऐतिहासिक ‘शिव सिनेमा हल’ लाई आधुनिक स्वरूप दिएर पुनः सञ्चालनमा ल्याउन लागेको हो ।

धरानको चतरालाइनमा अवस्थित करिब १७ कठ्ठा क्षेत्रफलमा फैलिएको पुरानो शिव सिनेमा हलको संरचनालाई नै आधुनिक प्रविधिमैत्री बनाउन लागिएको हो । निर्माण पक्षका अनुसार यो मल्टिप्लेक्समा दुईवटा अडिटोरियम (हल) रहनेछन् । एउटा हलमा २ सय ५० सिट क्षमता र अर्को हलमा १ सय ९० सिट क्षमता रहने हलका सञ्चालक समेत रहेका निर्माता तथा निर्देशक अधिकारीले जानकारी गराए ।

दर्शकहरूलाई विश्वस्तरीय फिल्मको अनुभव दिलाउन हलमा अत्याधुनिक साउन्ड सिस्टम र प्रोजेक्सन प्रविधि जडान गरिनेछ । साथै, हल परिसरभित्रै उच्च स्तरीय रेस्टुरेन्ट र क्याफेको सुविधासमेत उपलब्ध हुने जनाइएको छ । चलचित्र विकास बोर्डबाट सम्पूर्ण सरकारी प्रक्रिया पूरा गरी सञ्चालन इजाजत लिइसकेको यस परियोजनाको निर्माण कार्य हाल तीव्र गतिमा भइरहेको छ ।

@parikalanewsofficial

निर्माता तथा निर्देशक अधिकारीले आगामी नयाँ वर्ष अर्थात् २०८३ वैशाख १ गते देखि हल पूर्ण रूपमा सञ्चालनमा ल्याउने लक्ष्य राखिएको जानकारी दिए । धरान नेपाली फिल्मका लागि उर्वर बजार मानिन्छ । कुनै समय नेपाली फिल्मको बक्स अफिसमा राम्रो प्रभाव जमाएको शिव सिनेमा हल वर्षौंदेखि बन्द रहँदा स्थानीय दर्शक र निर्माताहरूलाई अभाव खड्किएको थियो ।

आफ्नै गौरवमय इतिहास बोकेको यो हल पुनः अत्याधुनिक रूपमा सञ्चालनमा आउँदा धरानको फिल्म बजार गुल्जार हुनुका साथै निर्माताहरूलाई पनि ठूलो राहत मिल्ने अपेक्षा गरिएको छ । यो सँगै अब धरानमा २ ओटा आधुनिक फिल्म हल हुने भएको छ । केहीवर्ष देखि फ्रेन्ड्स सिनेमाले एउटा पर्दा सञ्चालन गरिरहेको छ भने अर्को हल पनि सञ्चालनमा ल्याउने चर्चा छ ।