अष्ट्रेलिया र न्युजिल्याण्डमा ‘अभिमन्यु’को ऐतिहासिक प्रदर्शन, एक सातामै ५०० भन्दा बढी शो

इटहरी/ हाल नेपालका फिल्म हलहरुमा प्रदर्शन भइरहेको नेपाली फिल्म ‘अभिमन्यु : च्याप्टर १’ ले अष्ट्रेलिया र न्युजिल्याण्डमा प्रदर्शन हुनुअघि नै नयाँ कीर्तिमान कायम गरेको छ । आगामी डिसेम्बर ११ अर्थात् यही बिहीबारदेखि रिलिज हुन लागेको यो फिल्मले एक सातामै ५०० भन्दा बढी शो पाएर नेपाली फिल्मको इतिहासमा नयाँ अध्याय थपेको हो । अष्ट्रेलिया र न्युजिल्याण्डका प्रतिष्ठित हल चेनहरू इभेन्ट सिनेमाज, होयट्स सिनेमाज, भिलेज सिनेमाज, रिडिङ सिनेमाज लगायतका थिएटर पार्टनरहरूमा फिल्म प्रदर्शन हुनेछ ।

दर्शकको उच्च मागलाई ध्यानमा राख्दै थिएटरहरूको सङ्ख्या अझै थपिएको निर्माण पक्षले जनाएको छ । अष्ट्रेलियाका लागि आधिकारिक वितरक नमस्ते इन्टरटेनमेन्टका देव कार्कीका अनुसार, यो फिल्म दाइजो प्रथाको कालो सत्य उजागर गर्ने एक ‘सोसल थ्रिलर’ हो ।फिल्ममा समाजको यथार्थ, भावनात्मक उतारचढाव र न्यायको लडाइँलाई समेटिएको छ । विशेष कुरा के छ भने, यो फिल्म अष्ट्रेलियामा नेपाली र हिन्दी गरी दुवै संस्करणमा रिलिज हुँदैछ ।

नेपाली संस्करणमा अष्ट्रेलियाको न्यु साउथ वेल्स अवस्थित बरउड, बैंकसटाउन, ग्लेन्डेल, हर्सभिल, हर्नस्बी, लिभरपुल र पारामान्टामा प्रदर्शन हुनेछ । यस्तै भिक्टोरिया अवस्थीत ब्रोडमेडोज, सनसाइन, एयरपोर्ट वेस्ट, नक्स र प्लेन्टी भ्याली, वेस्टर्न अष्ट्रेलिया अवस्थित इनालु, क्विन्सल्याण्ड अवस्थित चेर्म्साइड र माउन्ट ग्राभ्याट, नर्दन टेरिटोरी अवस्थित क्यासुरिना, साउथ अष्ट्रेलियाको म्यारियन र सालिसबरी, क्यानबेराको वोडेन र तास्मानियाको ग्लेनोर्चीमा प्रदर्शन हुनेछ ।

@parikalanewsofficial

यस्तै हिन्दी भाषामा पनि न्यू साउथ वेल्सको बरउड, ग्लेन्डेल, हर्सभिल र हर्नस्बी, QLD को ब्रिसबेन सिटी, चेर्म्साइड, माउन्ट ग्राभ्याट र इन्डोरुपिली, SA को म्यारियन र NT को पाल्मरस्टनमा यो फिल्म प्रदर्शन गरिनेछ । त्यसैगरी न्युजिल्याण्डमा क्विन स्ट्रिट र टाउराङ्गा सेन्ट्रलमा नेपाली संस्करण तथा होयट्स रिकार्टनमा पनि फिल्म प्रदर्शन हुने तय भएको छ । यस किसिमको बृहत् रिलिजले प्रवासमा रहेका नेपाली दर्शकहरू माझ फिल्मप्रति उच्च उत्साह रहेको देखाएको छ ।

सुशान्त गौतमको निर्देशन र मुकेश खनालको लेखन रहेको यो फिल्ममा कामेश्वर चौरसिया, सरिता गिरी, किरण श्रेष्ठ, लक्ष्मी बर्देवा, गौमाया गुरुङ, प्रकाश दाहाल, शिशिर वाङ्देल लगायतको मुख्य भूमिका छ । विनोद पौडेल र गुञ्जन गिरी निर्माता रहेको फिल्ममा मनोज श्रेष्ठको भिएफएक्स र शरद महतोको छायांकन छ ।