‘ऊनको स्वीटर’: भारतीय बजार गान्तोकदेखि बैंगलोर र मुम्बईसम्म हाउसफुलको लहर

इटहरी/ नेपाली बक्स अफिसमा ५१ दिनसम्म ४० भन्दा बढी हलमा एकछत्र राज गर्दै करिब १२ करोडको ग्रास कलेक्सन गरेको फिल्म ‘ऊनको स्वीटर’को न्यानो अब भारतीय सहरहरूमा पनि फैलिन थालेको छ । आर्टमान्डू नेपाल प्रा.लि.ले निर्माण गरेको यो फिल्मले पूर्वोत्तर भारतबाट सुरु गरेको आफ्नो यात्रालाई दक्षिण भारतका प्रमुख सहरहरूसम्म सफलतापूर्वक प्रदर्शन गरेको छ ।

दुई साताअघि सिक्किमको राजधानी गान्तोकमा भएको प्रिमियर शोसँगै फिल्मको भारत यात्रा सुरु भएको थियो । सुरुवाती दुई शो हाउसफुल भएपछि दर्शकको उच्च मागलाई सम्बोधन गर्न शो सङ्ख्या बढाएर ६ पुर्‍याइएको थियो । गान्तोकको यो उत्साहजनक प्रतिक्रियाको आगो नाम्ची, कर्स्याङ, दार्जिलिङ, कालिम्पोङ, कोलकाता र सिलिगुडीसम्म फैलियो, जहाँ अहिले पनि फिल्मले दर्शकको बाक्लो साथ पाइरहेको छ ।

निर्माण टिमका अनुसार फिल्मले असामको गुवाहाटी, वेस्ट बङ्गालको कोलकाता, उत्तराखण्डको देहरादून, नयाँ दिल्ली, बैंगलोर र हैदरावादसम्म आफ्नो प्रभाव जमाइसकेको छ । सबैभन्दा रोचक कुरा त बैंगलोरमा देखिएको छ, जहाँ नेपाली भाषीहरूको जनसङ्ख्या तुलनात्मक रूपमा कम भए पनि प्रमुख चार हलहरूमा फिल्म हाउसफुल चलिरहेको छ । दक्षिण भारतमा प्राप्त यो सफलतालाई नेपाली फिल्म उद्योगकै लागि महत्त्वपूर्ण उपलब्धिका रूपमा हेरिएको छ ।

@parikalanewsofficial

दर्शकको बढ्दो मागसँगै निर्माण पक्षले डिसेम्बर १२ देखि फिल्मलाई भारतका थप सहरहरूमा विस्तार गर्ने घोषणा गरेको छ । यो मितिदेखि बलिउडको मुटु मुम्बईसहित हैदरावाद, हिमाञ्चलका पर्यटकीय सहरहरू (सिमला, धर्मशाला, कुल्लु), अरुणान्चल प्रदेशका तेजू र नामसाई, मेघालयको सिलोङ तथा असामका अन्य प्रमुख सहरहरूमा फिल्म आधिकारिक रूपमा प्रदर्शन हुनेछ ।

भारत प्रदर्शनका क्रममा गायक सुजन चापागाईँसहित भारतमै रहेका निर्देशक नवीन चौहानले यो सफलतालाई अभूतपूर्व भनेका छन् । उनले भने, “गान्तोकबाट सुरु भएको यात्रा दक्षिण भारतसम्म पुग्नु र त्यहाँ हाउसफुल हुनु हामीले कल्पना गरेकोभन्दा ठुलो उपलब्धि हो ।” उनले गैर-नेपाली भाषी दर्शकहरूले समेत फिल्ममा रुचि देखाएको बताउँदै यसले अन्तर्राष्ट्रिय बजारमा नेपाली कथाको ढोका खोलेको विश्वास व्यक्त गरे ।

विपिन कार्की, मिरूना मगर, एलेक्स पारस, परीक्षा लिम्बु र सुनिल पोखरेल लगायतको दमदार अभिनय रहेको यस फिल्मलाई भारतमा एसली प्रोडक्सन र एवन राईको समूहले वितरण गरेको हो । आर्टमान्डू नेपालले यस सफलताका लागि सम्पूर्ण दर्शक र साझेदारहरूप्रति आभार व्यक्त गरेको छ ।